AMD tomonidan sotib olingan Silo AI kompaniyasining sobiq rahbari Peter Sarlin tomonidan asos solingan Finlandiyaning QuTwo sunʼiy intellekt laboratoriyasi 25 million yevro miqdoridagi investitsiya jalb qildi. Natijada kompaniyaning umumiy qiymati 380 million dollarga yetdi. Ushbu mablagʻ Yevropada sunʼiy intellekt va kvant hisoblash texnologiyalariga boʻlgan qiziqish ortib borayotganini koʻrsatadi. Bu haqda Techcrunch.com xabar beradi.
QuTwo kompaniyasining asosiy mahsuloti QuTwo OS hisoblanadi. Bu tizim vazifalarni klassik, kvant yoki gibrid arxitekturalar oʻrtasida taqsimlovchi orkestratsiya qatlami vazifasini bajaradi. Kompaniya korporativ mijozlarga, xususan, Zalando kabi yirik chakana savdo tarmoqlariga sunʼiy intellekt yordamchilarini ishlab chiqishda koʻmaklashib, allaqachon 23 million dollarlik daromadga ega boʻlgan.
Peter Sarlin QuTwo kompaniyasini OpenAI kabi tezkor oʻsishga intiladigan loyihalardan farqli oʻlaroq, uzoq muddatli istiqbolga moʻljallangan tashkilot sifatida koʻradi. Uning soʻzlariga koʻra, kompaniya besh-oʻn yillik strategiya asosida rivojlanadi va Yevropaning texnologik suverenitetini mustahkamlashga xizmat qiladi.
Hozirgi kunda Yevropa AQSh texnologik yechimlariga muqobil sifatida mahalliy innovatsiyalarni qoʻllab-quvvatlamoqda. QuTwo aynan avtomobilsozlik, hayot haqidagi fanlar va oʻyin sanoati kabi Yevropa kuchli boʻlgan sohalarda tadqiqot va ishlanmalarni jadallashtirishni maqsad qilgan.
“Zamin”ni Telegramʻda oʻqing!
