AQSH Vakillar palatasi a’zolari ta’lim sohasidagi dasturiy ta’minot ishlab chiqaruvchi Instructure kompaniyasidan kiberxavfsizlik bo‘yicha izoh talab qilmoqda. Kompaniya tizimlariga qilingan ikki karra hujum natijasida butun dunyo bo‘ylab millionlab talabalarning shaxsiy ma’lumotlari o‘g‘irlangan. Vakillar palatasining Ichki xavfsizlik qo‘mitasi raisi Endryu Garbarino kompaniya bosh direktori Stiv Deliga yo‘llagan maktubida ushbu holat yuzasidan tergov boshlanganini ma’lum qildi. Bu haqda Techcrunch.com xabar beradi.
Qo‘mita xakerlar Instructure tizimiga qanday qilib qayta-qayta kira olgani, qanday turdagi ma’lumotlar sizib chiqqani va kompaniyaning CISA agentligi bilan hamkorligi qay darajada ekanligini aniqlashni maqsad qilgan. Canvas ta’lim portali bilan tanilgan kompaniya xakerlar bir xil zaiflikdan foydalanib, ham ma’lumotlarni o‘g‘irlagani, ham maktablarning kirish sahifalarini buzib kirgani uchun keskin tanqid ostida qolmoqda.
Instructure xakerlar bilan kelishuvga erishganini va ular o‘g‘irlangan ma’lumotlarni o‘chirib tashlaganiga doir dalillar taqdim etganini da’vo qilmoqda. Biroq, ShinyHunters xakerlik guruhi vakili to‘lov miqdorini oshkor etishdan bosh tortdi. Kiberxavfsizlik bo‘yicha ekspertlar xakerlarga to‘lov qilish kelajakdagi hujumlarni moliyalashtirishini va o‘g‘irlangan ma’lumotlar baribir saqlanib qolishi mumkinligini ta’kidlashmoqda.
Endryu Garbarino ta’kidlashicha, bir xil xakerlar tomonidan amalga oshirilgan ikkinchi hujum kompaniyaning hodisalarga javob berish qobiliyati va mijozlar oldidagi majburiyatlari yuzasidan jiddiy savollarni tug‘diradi. Hozircha Instructure rahbariyati yoki Stiv Deli Kongress oldida ko‘rsatma berishga tayyormi yoki yo‘qmi, bu borada rasmiy bayonot berilmadi.
“Zamin”ni Telegramʻda oʻqing!
