Elektron tijorat korxonalari uchun korporativ kredit kartalari va bank xizmatlarini taqdim etuvchi Parker startapi bankrotlik to‘g‘risida ariza topshirdi va o‘z faoliyatini to‘xtatdi. Y Combinator’ning 2019-yilgi dasturi ishtirokchisi bo‘lgan kompaniya Valar Ventures boshchiligidagi sarmoyalar bilan qo‘llab-quvvatlangan edi. Bu haqda Techcrunch.com xabar beradi.
2023-yilda keng omma uchun ochilgan Parker elektron tijorat kompaniyalari uchun maxsus moliyaviy mahsulotlar yaratishni maqsad qilgan edi. Kompaniya asoschisi va bosh direktori Yacine Sibous o‘zining “maxfiy retsepti” sifatida elektron tijoratdagi pul oqimlarini to‘g‘ri baholay oladigan anderrayting jarayonini ko‘rsatgan edi.
Hozirda Parker’ning rasmiy sayti hali ham ishlamoqda va unda 200 million dollardan ortiq mablag‘ jalb qilingani haqidagi ma’lumotlar saqlanib qolgan. Biroq, Patriot Bank mijozlarga kompaniya yopilgani haqida xabar bergan. Shuningdek, 7-may kuni topshirilgan sud hujjatlariga ko‘ra, startap 50 milliondan 100 million dollargacha bo‘lgan aktivlar va shuncha miqdordagi majburiyatlarga ega.
Fintech bo‘yicha maslahatchi Jason Mikula kompaniya sotib olinishi bo‘yicha muzokaralar muvaffaqiyatsiz yakunlangani sababli faoliyatini to‘satdan to‘xtatganini ta’kidladi. Bu holat kichik biznes mijozlarini qiyin ahvolda qoldirdi va bank hamkorlarining nazorati borasida savollar tug‘dirdi.
Yacine Sibous LinkedIn’dagi postida kompaniya 65 million dollar daromadga erishganini ta’kidlagan bo‘lsa-da, ortiqcha xodim yollash va reaktiv qarorlar qabul qilish kabi xatolarga yo‘l qo‘yganini tan oldi. Hozircha kompaniya rahbariyati vaziyat yuzasidan rasmiy bayonot bermadi.
“Zamin”ni Telegramʻda oʻqing!
