Niderlandiya o‘zining GPT-NL nomli milliy til modelini amaliyotda sinovdan o‘tkazishni boshladi. Ushbu loyiha Yevropaning Amerika sunʼiy intellekt tizimlariga bo‘lgan qaramligini kamaytirishga qaratilgan strategik qadam hisoblanadi. Ikki yillik ishlanmalardan so‘ng, model endilikda davlat xizmatlari, munitsipalitetlar va sud-kriminalistika sohalarida qo‘llanilmoqda. Bu haqda Ixbt.com xabar beradi.
GPT-NL oddiy foydalanuvchilar uchun emas, balki davlat infratuzilmasini raqamlashtirish uchun mo‘ljallangan. Hozirda 30 ga yaqin munitsipalitetda Gem nomli virtual yordamchi orqali fuqarolarning davlat xizmatlariga bo‘lgan murojaatlari samaradorligi oshirilmoqda. Shuningdek, model rasmiy hujjatlarni sodda va tushunarli tilda yozishga yordam berib, davlat va fuqaro o‘rtasidagi muloqotni osonlashtirmoqda.
Loyihaning eng muhim jihati uning mualliflik huquqiga yondashuvidir. OpenAI yoki Google kabi kompaniyalardan farqli o‘laroq, GPT-NL ishlab chiquvchilari mamlakatdagi yirik nashriyotlar, gazetalar va telekanallar bilan rasmiy litsenziya shartnomalarini imzolagan. Bu sunʼiy intellekt tarixida butun bir davlat miqyosidagi ommaviy axborot vositalari bilan tuzilgan ilk kollektiv kelishuvdir.
Shunga qaramay, loyiha resurslar tanqisligi muammosiga duch kelmoqda. OpenAI va Anthropic kabi gigantlar bilan solishtirganda, atigi 25 nafar dasturchidan iborat jamoa cheklangan budjet bilan ishlamoqda. Shunga qaramay, Niderlandiya ushbu tashabbus orqali davlat institutlari nazorati ostidagi, shaffof va xavfsiz sunʼiy intellekt rivojlanishining muqobil yo‘lini ko‘rsatib bermoqda.
“Zamin”ni Telegramʻda oʻqing!
