Mikro-drama trendi ommalashib bormoqda. ReelShort va DramaBox kabi ilovalar milliardlab daromad keltirayotgan bir paytda, Peacock platformasi o‘z ilovasida Bravo tomonidan tayyorlangan ikkita yangi mikro-dramani taqdim etishini e’lon qildi. Ushbu vertikal formatdagi videolar 60 soniyadan 90 soniyagacha davom etadi va TikTok uslubidagi qisqa tomosha tajribasini taqdim etishga mo‘ljallangan. Bu haqda Techcrunch.com xabar beradi.
Yangi loyihalardan biri «Salon Confessionals with Madison LeCroy» deb nomlanib, unda «Southern Charm» yulduzi mijozlariga tashqi ko‘rinishini o‘zgartirishda yordam beradi va shu jarayonda ularning eng qiziqarli hikoyalarini tinglaydi. Ikkinchi loyiha «Campus Confidential: Miami» esa kollej talabalari hayotiga bag‘ishlangan. Peacock ma’lumotlariga ko‘ra, bu AQShdagi yirik striming platformasi tomonidan mikro-dramalar ishlab chiqarilgan ilk holatdir.
Xitoyda ommalashgan mikro-dramalar bozori AQShda ham jadal rivojlanmoqda. Appfigures tahliliy firmasiga ko‘ra, ReelShort 2025-yilda 1,2 milliard dollar daromad ko‘rgan, DramaBox esa o‘z ko‘rsatkichlarini ikki barobardan ko‘proqqa oshirgan. Hozirda bozorda ko‘plab past sifatli, shablon asosida yaratilgan seriallar mavjud bo‘lsa-da, foydalanuvchilar ularga katta qiziqish bildirmoqda.
Peacock va Bravo hamkorligi ushbu yo‘nalishda sifatliroq yondashuvni taqdim etishi mumkin. Platforma o‘zining sodiq auditoriyasi «Vanderpump Rules» kabi mashhur shoularni tomosha qilish uchun ilovaga kirganida, qisqa va qiziqarli videolarga ham e’tibor qaratishiga umid qilmoqda.
“Zamin”ni Telegramʻda oʻqing!
