Google kompaniyasi o‘zining Android uchun mo‘ljallangan Gboard klaviaturasiga sun’iy intellektga asoslangan Rambler nomli yangi ovozli diktovka funksiyasini taqdim etdi. Ushbu yangilik Wispr Flow va Typeless kabi ovozli yozuv ilovalari uchun jiddiy raqobatni yuzaga keltirishi kutilmoqda, chunki ular hozirgacha Android tizimida mustahkam o‘rnashib olmagan edi. Bu haqda Techcrunch.com xabar beradi.
Rambler funksiyasi nutq jarayonidagi keraksiz so‘zlarni avtomatik tarzda olib tashlaydi va gap o‘rtasidagi tuzatishlarni ham to‘g‘ri tushunadi. Gemini modellariga asoslangan ushbu texnologiya turli tillar o‘rtasida erkin almashish (code switching) imkonini beradi. Bu foydalanuvchilarga bir gap ichida bir nechta tildan foydalanish va kontekstni yo‘qotmasdan muloqot qilish imkonini beradi.
Maxfiylik masalasiga to‘xtalar ekan, Google vakillari ovozli yozuvlar saqlanmasligini va ma’lumotlar ham qurilmaning o‘zida, ham bulutli texnologiyalar yordamida qayta ishlanishini ta’kidladi. Kompaniya ushbu funksiyani xavfsiz va shaxsiy ma’lumotlarga daxlsiz deb hisoblaydi, bu esa uchinchi tomon ilovalaridan foydalanuvchi mijozlar uchun muhim omil hisoblanadi.
Dastlabki bosqichda Rambler funksiyasi faqat Samsung Galaxy va Google Pixel smartfonlari uchun mavjud bo‘ladi, keyinchalik esa boshqa Android qurilmalariga ham yetib boradi. Gboard dunyo bo‘ylab millionlab Android foydalanuvchilari uchun asosiy klaviatura bo‘lgani sababli, Google ushbu texnologiya orqali bozordagi ustunligini yanada mustahkamlamoqchi.
“Zamin”ni Telegramʻda oʻqing!
