Northrop Grumman kompaniyasi kosmik apparatlar uchun mo‘ljallangan yangi ixcham LR-450 navigatsiya va pozitsiyalash tizimini namoyish etdi. Ushbu qurilma Yer orbitasidagi sun’iy yo‘ldoshlardan tortib, sayyoralararo stansiyalar va qo‘nish modullarigacha bo‘lgan turli xil missiyalarda foydalanish uchun ishlab chiqilgan. Bu haqda Ixbt.com xabar beradi.
LR-450 tizimining asosiy afzalligi — tashqi sun’iy yo‘ldosh signallari mavjud bo‘lmagan taqdirda ham apparatning joylashuvi va yo‘nalishini uzluksiz aniqlash qobiliyatidir. Tizim mHRG (milli-Hemispherical Resonating Gyroscopes) deb nomlangan miniatyura giroskoplari asosidagi inersial navigatsiyadan foydalanadi. Bu texnologiya tashqi aloqaga ehtiyoj sezmasdan harakat va aylanishlarni aniq o‘lchash imkonini beradi.
Yangi model Northrop Grumman kompaniyasining ko‘p yillik tajribasiga ega HRG giroskoplari texnologiyasiga asoslangan. Ushbu turdagi tizimlar kosmosda jami 70 million soatdan ortiq ishlagan va xususan, "Jeyms Uebb" kosmik teleskopida ham qo‘llanilgan. LR-450 avvalgi SSIRU tizimlarida ishlatilgan datchiklarning yanada ixchamlashtirilgan versiyasidir.
Tizimning kichik o‘lchami va yengilligi uni turli kosmik apparatlarga integratsiya qilishni osonlashtiradi, bu esa foydali yuk uchun ko‘proq joy va vazn tejash imkonini beradi. Shuningdek, qurilma kam energiya sarflaydi va texnik xizmat ko‘rsatmasdan millionlab soat davomida uzluksiz ishlashga mo‘ljallangan.
Northrop Grumman vakili Rayan Arringtonning ta’kidlashicha, LR-450 yuqori aniqlik, ishonchlilik va maqbul narxni o‘zida mujassam etgan. Hozirgi kunda tizim butun dunyo bo‘ylab tijorat va ilmiy kosmik platformalarga o‘rnatish uchun buyurtmalarga ochiq.
“Zamin”ni Telegramʻda oʻqing!
