Aotos Flux X26 gibrid elektrovelosipedi Kickstarter kraudfanding platformasida katta muvaffaqiyatga erishdi. Dastlabki 85 ming dollar maqsad qilingan bo‘lsa-da, loyiha allaqachon 2,5 million dollardan ortiq mablag‘ to‘plab, foydalanuvchilar orasida katta qiziqish uyg‘otdi. Bu haqda Ixbt.com xabar beradi.
Velosiped ikki xil versiyada taqdim etilgan. Baza modeli 750 W quvvatli motor bilan jihozlangan bo‘lib, soatiga 32 km tezlikda harakatlanadi va bir quvvatlanishda 80 km masofani bosib o‘tadi. Pro versiyasi esa 2000 W cho‘qqi quvvatiga ega motor, 45 km/soat tezlik va 113 km masofani bosib o‘tish imkonini beradi.
Texnik jihatdan qurilma Bluetooth, raqamli boshqaruv paneli, smartfon orqali qulfdan chiqarish, shuningdek, GPS va 4G modullari bilan boyitilgan. Ishlab chiqaruvchi ushbu transport vositasini nafaqat shahar ichida qatnash, balki faol dam olish uchun ham mo‘ljallangan yangi turdagi elektr transporti sifatida taqdim etmoqda.
Narxlar ham xaridorlar uchun maqbul ko‘rinadi: baza versiyasi 1200 dollar, Pro versiyasi esa 1600 dollar etib belgilangan. Mahsulotni butun dunyo bo‘ylab yetkazib berish rejalashtirilgan bo‘lib, ilk yetkazib berishlar 2026-yilning iyun oyiga mo‘ljallangan.
“Zamin”ni Telegramʻda oʻqing!
