Aventon kompaniyasi ham kundalik shahar sayrlari, ham uzoq masofali sayohatlar uchun moʻljallangan yangi Trava EXP turistik elektrovelosipedini taqdim etdi. Model ikki xil koʻrinishda — klassik va qulay oʻtirish uchun pastroq ramali variantlarda sotuvga chiqariladi. Boshlangʻich komplektatsiyaning oʻzidayoq velosiped qanotlar, tayanch (podnojka), oʻrnatilgan yoritish tizimi va yuklar uchun orqa bagaj bilan jihozlangan. Bu haqda Ixbt.com xabar beradi.
Harakatlanish uchun markazga oʻrnatilgan Aventon Ultro S elektromotori javob beradi. Uning choʻqqi quvvati 750 W, aylantiruvchi momenti esa 90 N·m ga teng. Ishlab chiqaruvchining taʼkidlashicha, ushbu elektr privod velosipedchining kuchini toʻrt baravargacha oshirib berishi mumkin, bu esa tepaliklarga koʻtarilish va uzoq yoʻllarda charchab qolmaslikni taʼminlaydi.
Quvvat manbai sifatida 800 W·soat sigʻimli akkumulyator tanlangan boʻlib, u bir marta quvvatlanish orqali taxminan 190 km masofani bosib oʻtishga imkon beradi. Velosipedning umumiy vazni qariyb 28 kg ni tashkil etadi. Trava EXP modelining asosiy oʻziga xosliklaridan biri — anʼanaviy zanjir oʻrniga Gates tasmali privodidan foydalanilganidir. Bunday yechim kamroq texnik xizmat talab qiladi va ancha jim ishlaydi.
Shuningdek, velosiped Enviolo Automatiq Trekking pogʻonasiz transmissiyasi bilan jihozlangan boʻlib, u inson aralashuvisiz optimal uzatmani mustaqil tanlay oladi. Komfortni oshirish uchun old qismga amortizatsiyali vilka va oʻrindiq ostiga maxsus amortizator oʻrnatilgan. Ishlab chiqaruvchi katta masofa zaxirasi va viteslarni qoʻlda almashtirish zarurati yoʻqligiga asosiy urgʻu bermoqda.
“Zamin”ni Telegramʻda oʻqing!
