Vivo kompaniyasi Xitoy bozorida yangi Vivo S60 turkumidagi smartfonlar uchun tizer kampaniyasini boshlab yubordi. Kompaniyaning mahsulot menejeri Xan Bosyao yangi qurilmaning dizayni yozgi okean to‘lqinlaridagi yorqin akslardan ilhomlangan holda yaratilganini ma’lum qildi. Smartfonning orqa paneli harakatlanish jarayonida xuddi suv yuzasidagi jilvalanish kabi o‘zgaruvchan yorug‘lik effektlarini namoyish etadi. Bu haqda Ixbt.com xabar beradi.
Texnik jihatlarga to‘xtaladigan bo‘lsak, Vivo S60 6,59 dyuymli, 1,5K aniqligidagi yupqa hoshiyali va burchaklari yumaloqlangan ekran bilan jihozlanadi. Qurilmaning eng e’tiborli jihatlaridan biri uning 7000 mA·soat sig‘imga ega ulkan akkumulyatori bo‘lib, u 90 W quvvatda tezkor quvvatlanishni qo‘llab-quvvatlaydi.
Smartfon imkoniyatlari qatoriga Sony IMX8 seriyasidagi periskop kamera, displey ostiga o‘rnatilgan ultratovushli barmoq izi skaneri hamda IP68/IP69 standartidagi suv va changdan himoya tizimi kiradi. Shuningdek, qurilma metall korpus va maxsus g‘iloflar yordamida magnitli aksessuarlar bilan ishlash imkoniyatiga ega bo‘ladi.
“Zamin”ni Telegramʻda oʻqing!
