Bloomberg xabariga koʻra, OpenAI kompaniyasi Apple bilan hamkorlikdan norozi boʻlib, sudga murojaat qilish imkoniyatlarini koʻrib chiqmoqda. ChatGPT integratsiyasi kutilgan obunachilar sonini va daromadni olib kelmagani OpenAI rahbariyatini jiddiy xavotirga solgan. Bu haqda Techcrunch.com xabar beradi.
2024-yil iyun oyida eʼlon qilingan hamkorlik doirasida ChatGPT iPhone tizimlariga, xususan Siri va Visual Intelligence funksiyalariga kiritilgan edi. Biroq OpenAI ushbu funksiyalar foydalanuvchilar uchun qulay joylashtirilmagani va daromad koʻrsatkichlari prognozlardan ancha pastligidan shikoyat qilmoqda.
Apple esa oʻz navbatida OpenAIʼning maxfiylik standartlari va kompaniyaning apparat taʼminoti bozoriga kirib borishga urinishlaridan norozi. Apple sobiq dizayn rahbari Jony Ive boshchiligidagi bu harakatlar ikki kompaniya oʻrtasidagi munosabatlarni yanada sovitgan.
Bu holat Appleʼning hamkorlar bilan ishlashdagi murakkab tarixini yana bir bor eslatdi. Ilgari Google, Adobe va Spotify kabi gigantlar ham Appleʼning platforma ustidan toʻliq nazorat oʻrnatish siyosati tufayli turli muammolarga duch kelishgan edi.
“Zamin”ni Telegramʻda oʻqing!
