CAS Space kompaniyasi Kinetica-1 (Litszyan-1) raketa-tashuvchisi yordamida beshta sunʼiy yoʻldoshni muvaffaqiyatli orbitaga chiqardi. Parvoz Pekin vaqti bilan soat 12:33 da Tszsyutsyuan kosmodromidagi tijoriy maydonchadan amalga oshirildi. Bu haqda Ixbt.com xabar beradi.
Orbitaga Taytszin-3 (ikkita apparat), Tyani-50, Tyanyan-27 va Tszilin-1 sunʼiy yoʻldoshlari yetkazildi. Kinetica-1 raketasi toʻrt bosqichli qattiq yoqilgʻili tizim boʻlib, uzunligi 31 metrni tashkil etadi va past Yer orbitasiga 2 tonnagacha foydali yukni olib chiqish imkoniyatiga ega.
Ushbu parvoz Kinetica-1 uchun 13-missiya va 2026-yildagi ikkinchi muvaffaqiyatli start boʻldi. Xitoyning tijoriy kosmonavtikasi jadal rivojlanib, aloqa, kuzatuv va navigatsiya sunʼiy yoʻldoshlari guruhini kengaytirmoqda.
Mamlakat kosmik parvozlar surʼatini oshirib, 2025-yilda 92 ta start bilan yangi rekord oʻrnatdi. Shu bilan birga, Xitoy Oy, asteroidlar va Marsni tadqiq etish boʻyicha uzoq muddatli dasturlarni hamda xalqaro hamkorlik uchun ochiq boʻlgan orbital stansiya faoliyatini qoʻllab-quvvatlamoqda.
“Zamin”ni Telegramʻda oʻqing!
