Oklenddagi federal sud Ilon Maskning OpenAI kompaniyasiga qarshi da'vosini rad etdi. Sud qaroriga ko'ra, milliarder o'zi asos solishda ishtirok etgan kompaniyaga nisbatan e'tirozlarini juda kech bildirgan. Hakamlar hay'ati ikki soatdan kamroq vaqt davom etgan muhokamadan so'ng bir ovozdan shunday xulosaga keldi. Bu haqda Ixbt.com xabar beradi.
Ilon Mask 2024-yilda bergan da'vosida OpenAI rahbari Sem Altman va prezident Greg Brokmanni dastlabki kelishuvlarni buzganlikda ayblagan edi. Uning so'zlariga ko'ra, notijorat tashkilot sifatida yaratilgan kompaniya keyinchalik Microsoft kabi hamkorlardan milliardlab dollar sarmoya jalb qilib, foyda ko'zlovchi biznesga aylantirilgan. Mask loyihaga 38 million dollar sarmoya kiritganini va kompaniya tuzilmasi o'zgartirilgach, jarayondan chetlatilganini ta'kidlagan.
OpenAI vakillari esa Maskning da'vosi asossiz ekanini va u sun'iy intellekt bozori katta moliyaviy o'sishga erishganidan so'nggina e'tiroz bildirishga qaror qilganini ta'kidladi. Sud jarayoni 11 kun davom etdi va sun'iy intellekt sohasidagi eng shov-shuvli bahslardan biriga aylandi. Tomonlar sud davomida bir-birining obro'siga putur yetkazishga urinishdi.
OpenAI 2015-yilda Sem Altman, Ilon Mask va boshqa tadbirkorlar tomonidan notijorat tashkilot sifatida tashkil etilgan. Mask 2018-yilda direktorlar kengashini tark etgan, 2019-yilda esa kompaniya investitsiyalarni jalb qilish uchun tijorat bo'linmasini yaratgan edi. Hozirda OpenAI Google DeepMind, Anthropic va Maskning o'ziga tegishli xAI kompaniyasi bilan raqobatlashmoqda.
“Zamin”ni Telegramʻda oʻqing!
