Oura kompaniyasi oʻzining mashhur aqlli uzuklarining beshinchi avlodi — Ring 5 modelini rasman eʼlon qildi. Yangi qurilma avvalgisiga qaraganda 40 foizga kichikroq boʻlib, yanada aniqroq sensorlar va yaxshilangan akkumulyator quvvati bilan ajralib turadi. Kompaniya mahsulot menejeri Maz Brumandning soʻzlariga koʻra, foydalanuvchilarning ixchamroq dizayn borasidagi istaklarini inobatga olgan holda, uzukning qalinligi 30 foizga, kengligi esa taxminan 2 millimetrga qisqartirilgan. Bu haqda Techcrunch.com xabar beradi.
Ring 5 modeli olti xil rangda, jumladan, yangilangan oltin (Gold), mis rangiga yaqin Deep Rose, shuningdek, Silver, Brushed Silver, Black va Stealth qoplamalarida sotuvga chiqadi. Qurilmaning boshlangʻich narxi 399 dollarni tashkil etadi. Taqqoslash uchun, Ring 4 modeli 349 dollardan sotilgan edi. Yangi aqlli uzuk 4-iyundan boshlab yetkazib berila boshlaydi va hozirda unga oldindan buyurtma berish imkoniyati mavjud.
Texnik jihatdan Ring 5 sezilarli darajada takomillashtirilgan. Uning akkumulyatori endi 6 kundan 9 kungacha xizmat qiladi (Ring 4 da bu koʻrsatkich 5–8 kun edi). Shuningdek, sensorlar barmoq terisi bilan yaxshiroq aloqa qilish uchun qayta ishlangan va turli teri ranglarida ham yuqori aniqlikni taʼminlash uchun kuchliroq LED chiroqlari bilan jihozlangan. Bu oʻzgarishlar RingConn va Ultrahuman kabi raqobatchilarning bozordagi faolligi oshgan bir paytda amalga oshirildi.
Dasturiy taʼminot nuqtayi nazaridan Oura “Health Radar” funksiyasini ishga tushirdi. Ushbu tizim fonda biometrik signallarni kuzatib boradi va foydalanuvchi eʼtibor berishi kerak boʻlgan oʻzgarishlarni aniqlaydi. Yangi funksiyalar qatoriga qon bosimi signallari va tungi nafas olishni nazorat qilish tizimi kiritilgan. Ayniqsa, uyqu paytidagi qon bosimi oʻzgarishlarini kuzatish orqali yurak-qon tomir tizimidagi yashirin xavflarni erta aniqlash imkoniyati yaratilgan.
“Zamin”ni Telegramʻda oʻqing!
