Kelajakning eng muhim bozorlaridan biri LLM tokenlari boʻlishi kutilmoqda va yirik moliyaviy guruhlar ular uchun yangi infratuzilma yaratishga shoshilmoqda. Reuters xabariga koʻra, Xitoyning Shanxay fyuchers birjasi (Shanghai Futures Exchange) hozirda sunʼiy intellekt tokenlari uchun derivativlar bozorini loyihalashtirmoqda. Bu haqda Techcrunch.com xabar beradi.
Ushbu yangilik CME Group va NYSE egasi boʻlgan Intercontinental Exchange kabi yirik birjalar GPU ijarasi uchun fyuchers shartnomalarini ishga tushirish ustida ishlayotganini maʼlum qilgan bir paytda chiqdi. GPU bozori hali shakllanish bosqichida boʻlsa-da, videokartalarni sotuvchi va ijaraga beruvchi kompaniyalar koʻpligi sababli, soatbay ijara narxlari boʻyicha barqaror spot bozori yuzaga kelgan.
AI Mining Co. maʼlumotlariga koʻra, NVIDIA H100 grafik protsessorlarining oʻrtacha ijara narxi soatiga 1,40 dollardan 4,27 dollargacha, H200 modellari esa 2,34 dollardan 5 dollargacha baholanmoqda. GPU bozori rivojlangan boʻlsa-da, zamonaviy AI modellarining asosiy qurilish bloki boʻlgan tokenlar atrofida infratuzilma hali yetarli emas.
Yirik sunʼiy intellekt kompaniyalari oʻz xizmatlarini tokenlar orqali narxlamoqda. Masalan, OpenAI oʻzining soʻnggi GPT-5.5 modeli API xizmati uchun har million kirish tokeniga 5 dollar, chiqish tokeniga esa 30 dollar haq oladi. Hatto Amazon Bedrock kabi bulutli tizimlar ham har bir token uchun toʻlov tizimiga oʻtmoqda.
Shanxay birjasining ushbu tashabbusi AI infratuzilmasiga kiritilayotgan mislsiz investitsiyalar davriga toʻgʻri keldi. Yangi derivativ mahsulotlar AI kompaniyalari oʻz xizmatlarini qanday narxlashiga bogʻlanadi. Bu esa investorlar va maʼlumotlar markazlari operatorlariga hisoblash quvvati xarajatlarining oʻzgarishidan himoyalanish (xejirlash) imkonini beradi.
“Zamin”ni Telegramʻda oʻqing!
