Xiaomi kompaniyasi oʻzining yangi flagman simsiz changyutgichi — Mijia Cordless Vacuum Cleaner 4 Max modelini ichki bozorda rasman sotuvga chiqardi. Qurilma JD.com platformasida 2351 yuan (345 dollar) narxda taqdim etilgan boʻlsa-da, sotuvlarning dastlabki bosqichida maxsus chegirma bilan 2045 yuan (300 dollar) evaziga xarid qilish imkoniyati mavjud. Bu haqda Ixbt.com xabar beradi.
Ushbu changyutgich 800 W quvvatga ega va daqiqasiga 150 000 marta aylanadigan yuqori tezlikdagi choʻtkasiz dvigatel bilan jihozlangan. Bu tizim 280 AVt (aerovatt) miqdoridagi hayratlanarli soʻrish quvvatini taʼminlaydi. Toʻplam tarkibidan 685 W quvvatli F201-JZ rusumli quvvatlantirish bazasi ham oʻrin olgan.
Qurilmaning asosiy oʻziga xosligi uning ikki kanalli chang yigʻish texnologiyasidir. Mazkur tizim foydalanuvchiga chang toʻplagichni 100 kungacha tozalashni unutish imkonini beradi. Shuningdek, choʻtka qismi yashirin chang va kirlarni aniqlash uchun 180 darajali koʻk chiroqli yoritish tizimi bilan taʼminlangan.
Mijia Cordless Vacuum Cleaner 4 Max aqlli uy tizimiga Xiaomi Pengpai (HyperOS Connect) orqali integratsiya qilinadi va ifloslanish darajasini avtomatik aniqlay oladi. 4000 mAch sigʻimli akkumulyator 90 daqiqagacha uzluksiz ishlashni kafolatlaydi. Havoni tozalash uchun esa 8 bosqichli nozik filtrlash tizimi masʼuldir.
Changyutgichning umumiy balandligi stansiyasi bilan birga 1173 mm ni, asosiy blokning oʻzi esa 932 mm ni tashkil etadi. F201 model raqamiga ega qurilmaning umumiy vazni 10,2 kg ga teng.
“Zamin”ni Telegramʻda oʻqing!
