NVIDIA bosh direktori Jensen Huang Tayvan yarimoʻtkazgich sanoatining yetakchi kompaniyalari sharafiga tashkil etilgan tadbirda nutq soʻzladi. U oʻz chiqishida joriy yilning ikkinchi yarmi NVIDIA tarixi uchun eng muvaffaqiyatli davr boʻlishini, chunki kompaniya yangi avlod texnologiyalari sohasida Tayvan yetkazib beruvchilari bilan hamkorlikni yanada mustahkamlayotganini taʼkidladi. Bu haqda Ixbt.com xabar beradi.
Jurnalistlar Huawei kompaniyasining yangi chip texnologiyasi haqida soʻrashganda, Jensen Huang bu muhim voqea boʻlsa-da, TSMC kabi gigantlar uchun hali xavf tugʻdirmasligini bildirdi. Uning soʻzlariga koʻra, Huawei yarimoʻtkazgich jarayonida liniya kengligini kamaytirmasdan tranzistorlar sonini ikki-uch baravar oshirish texnologiyasidan foydalanmoqda. "Bu juda yaxshi texnologiya, ammo TSMC unga 10 yildan beri egalik qiladi", — deya qoʻshimcha qildi NVIDIA rahbari.
Huangning tushuntirishicha, TSMC koʻp qatlamli chiplarni joylashtirish va 3D-qadoqlash texnologiyalarini oʻn yildan beri qoʻllab kelmoqda va bu sohada ulkan yutuqlarga erishgan. NVIDIA Xitoy ishlab chiqaruvchisining innovatsiyalarini va yangi "Tau" masshtablash qonunini yuqori baholasa-da, Huawei hali ham jahon miqyosidagi raqobatchilardan sezilarli darajada ortda qolmoqda deb hisoblaydi.
NVIDIA bosh direktori oʻz kompaniyasining yutuqlariga toʻxtalib: "Biz har qanday bulutli xizmatda qoʻllanilishi mumkin boʻlgan yagona platforma, chip va hisoblash arxitekturasimiz. Biz raqobatni olqishlaymiz va NVIDIA shunchaki oldinga harakat qilishda davom etishi kerak", — dedi. Avvalroq Pekin universiteti tadqiqotchilari Huawei chiplari asosida yotuvchi "LogicFolding" (mantiqiy taxlash) arxitekturasini ishlab chiqqanliklarini eʼlon qilishgan edi.
Huawei ilmiy guruhi direktori He Tingbo yangi "Tau" masshtablash qonuni jahon chip sanoati uchun yangi yoʻnalish ochishiga ishonadi. Shuningdek, Huawei xitoylik tadqiqotchilar bilan hamkorlikda ikki oʻlchovli parallel hisoblashlar uchun dunyodagi birinchi chipni ishlab chiqqanini maʼlum qilgan.
“Zamin”ni Telegramʻda oʻqing!
