Xitoy oʻzining Oy dasturini keng koʻlamli qayta tashkil etishni boshladi. Pekin 2030-yildan kechiktirmay taykonavtlarni Oy sirtiga qoʻndirish maqsadida barcha resurslarni safarbar etishini maʼlum qildi. Bu haqda Xitoy boshqariladigan kosmik parvozlar agentligi (CMSA) matbuot kotibi Chjan Szinbo “Shenzhou-23” kemasi uchirilishi arafasida oʻtkazilgan chiqishida taʼkidlab oʻtdi. Bu haqda Ixbt.com xabar beradi.
Asosiy oʻzgarish ilgari tarqoq boʻlgan yoʻnalishlarni yagona integratsiyalashgan dasturga birlashtirishdan iborat. Endilikda boshqariladigan Oy dasturi, “Chang‘e” seriyasidagi avtomatik missiyalar va “Tiangong” orbital stansiyasidagi tadqiqotlar yagona davlat rejasi doirasida rivojlantiriladi. Bu loyihalar oʻrtasida texnologiyalar almashinuvini tezlashtirish va sinov muddatlarini qisqartirish imkonini beradi.
Dasturning asosiy elementlari sifatida “Changzheng-10” oʻta ogʻir raketasi, “Mengzhou” boshqariladigan kemasi va “Lanyue” Oyga qoʻnish moduli koʻrsatilgan. Hozirda sinov jarayonlari qizgʻin davom etmoqda: 2025-yilda “Changzheng-10” raketasining birinchi bosqichi olovli sinovlardan oʻtkazildi va qoʻnish tizimlari tekshirildi.
Shu bilan birga, uchuvchisiz missiyalar ham toʻxtab qolgani yoʻq. Joriy yilning oʻzida Oyning janubiy qutbiga suv muzlarini qidirish uchun “Chang‘e-7” avtomatik stansiyasi va lunoxod yuborilishi rejalashtirilgan. Xitoy ushbu qadamlar orqali koinotni oʻzlashtirish poygasida yetakchilikni qoʻlga kiritishni koʻzlamoqda.
“Zamin”ni Telegramʻda oʻqing!
