Amerikaning Figure AI kompaniyasi oʻzining odamsimon robotlarini ishlab chiqarish surʼati keskin oshganini maʼlum qildi. Kompaniya maʼlumotlariga koʻra, 120 kundan kamroq vaqt ichida Figure 03 modelini ishlab chiqarish kuniga bir donadan soatiga bir donagacha koʻtarildi. Bu yigʻuv liniyasi unumdorligining 24 baravar oshganini anglatadi. Bu haqda Ixbt.com xabar beradi.
Ishlab chiquvchilarning soʻzlariga koʻra, bugungi kunga qadar 350 tadan ortiq uchinchi avlod robotlari hamda gumanoidlar konstruksiyasida qoʻllaniladigan 9000 dan ortiq turli xil privodlar ishlab chiqarilgan. Avtomobil sanoati uchun bu raqamlar kamtarona koʻrinishi mumkin, biroq gumanoid robotlar bozori uchun bu soʻnggi yillardagi eng sezilarli ishlab chiqarish sakrashlaridan biridir.
Figure sohaga yangi bosqichga qadam qoʻyayotganiga ishonadi. Agar ilgari asosiy eʼtibor robotlarning raqsga tushishi yoki yugurishi aks etgan videolarga qaratilgan boʻlsa, endilikda raqobat ommaviy ishlab chiqarish, ishonchlilik va sunʼiy intellektni oʻqitish uchun maʼlumotlar toʻplash tomon siljimoqda. Har bir ishlayotgan robot harakatlar, xatolar va atrof-muhit haqida ulkan hajmdagi maʼlumotlarni yigʻadi, bu esa boshqaruv algoritmlarini yaxshilashga xizmat qiladi.
Ishlab chiqarishni kengaytirish uchun Figure 150 dan ortiq oʻzaro bogʻlangan ishchi stansiyalarni boshqaradigan xususiy dasturiy taʼminotni ishlab chiqdi. Sifatni nazorat qilish maqsadida zavodda 50 dan ortiq oraliq tekshirish bosqichlari va har bir robot uchun 80 dan ortiq yakuniy testlar joriy etilgan. Shuningdek, akkumulyatorlarni sinash va yashirin nuqsonlarni aniqlash uchun minglab takroriy harakatlardan iborat burn-in testlari oʻtkazilmoqda.
Hozirda Figure robotlarning katta guruhlarini boshqarish uchun zarur boʻlgan infratuzilmani ham barpo etmoqda. Bunga dasturiy taʼminotni masofadan yangilash, nosozliklarni tashxislash va butun qurilmalar parkini servis xizmati bilan taʼminlash tizimlari kiradi. Kompaniya maʼlumotlariga koʻra, robotlarni muvaffaqiyatli yigʻish koʻrsatkichi allaqachon 80 foizdan oshgan.
“Zamin”ni Telegramʻda oʻqing!
