Britaniya dengiz konsorsiumi yangi avlod vodorod energetika xabi — dunyodagi birinchi qirgʻoq elektr tarmogʻiga bogʻlanmagan mustaqil suzuvchi platforma sinovlari muvaffaqiyatli yakunlanganini eʼlon qildi. Hydrogen Power Hub loyihasi yirik kemalarni portda toʻxtab turganda, quruqlikdagi infratuzilmaga ulanmasdan turib, toza energiya bilan taʼminlash uchun ishlab chiqilgan. Bu haqda Ixbt.com xabar beradi.
Tizim olti burchakli shakldagi uchta modulli suzuvchi platformadan iborat boʻlib, ular yigʻilganda umumiy maydoni 1200 kvadrat metrga teng yagona majmuani hosil qiladi. Qurilma ichiga umumiy sigʻimi 45 MW·soat boʻlgan akkumulyatorlar, 1,3 MW quvvatli yoqilgʻi elementlari, vodorod generatorlari va 146 kW quvvatga ega quyosh panellari joylashtirilgan.
Gibrid sxema asosida ishlaydigan ushbu xab haftasiga taxminan 91 MW·soat energiya ishlab chiqarish imkoniyatiga ega. Tizim har hafta 7,5–8 tonna vodorod sarflaydi, u platformaga oʻrnatilgan yetti ta modulli rezervuarda saqlanadi. Yoqilgʻi quyish haftasiga ikki marta amalga oshiriladi, bu esa majmuaning uzluksiz ishlashini taʼminlaydi.
Ishlab chiquvchilarning taʼkidlashicha, ushbu avtonom arxitektura portlarni «yashil» modernizatsiya qilishdagi asosiy muammo — qirgʻoq tarmoqlaridagi quvvat yetishmovchiligi va yangi podstansiyalar qurishdagi qiyinchiliklarni hal qiladi. Kelajakda bunday tizimlar texnik yoki iqtisodiy sabablarga koʻra tarmoqni yangilash imkoni boʻlmagan portlar uchun anʼanaviy infratuzilmaga asosiy muqobil boʻlishi kutilmoqda.
“Zamin”ni Telegramʻda oʻqing!
