Blue Origin kompaniyasi kutilmagan xushxabarni eʼlon qildi: New Glenn ogʻir raketasining Never Tell Me The Odds deb nomlangan birinchi pogʻonasi Florida shtatidagi LC-36 start majmuasida yuz bergan kuchli portlash toʻlqinidan zarar koʻrmadi. Kompaniya bosh direktori Dave Limp mutaxassislar allaqachon maydonga qaytganini va dastlabki koʻrik natijasida raketa tezlatgichi hamda ikkinchi pogʻonalar yaxshi holatda ekanini tasdiqladi. Bu haqda Ixbt.com xabar beradi.
Shuni aniqlashtirish kerakki, oʻsha vaqtda olovli sinovlardan oʻtayotgan raketa butunlay yoʻq qilingan. Biroq Never Tell Me The Odds (GS1-SN002) va boshqa butlovchi qismlar start maydonchasi yaqinidagi Horizontal Integration Facility (HIF) binosi ichida boʻlgani sababli omon qolgan. Hozirda ushbu texnikalar avvalgi parvozlardan soʻng qayta ishlov berish jarayonida edi.
Blue Origin rahbariyati shikastlangan LC-36 maydonchasini tiklash bilan bir qatorda, eski LC-11 oʻrnida yangi start majmuasini qurish imkoniyatlarini koʻrib chiqmoqda. Bu chora sinovlarga tezroq qaytish va kelajakda bir vaqtning oʻzida ikkita maydonchadan parvozlarni amalga oshirish imkonini beradi.
Eslatib oʻtamiz, avvalroq Kanaveral burnida New Glenn raketasi bilan bogʻliq jiddiy koʻngilsizlik yuz bergan edi. NASA administratori Jared Isaacman voqea joyiga yetib kelib, vertolyot yordamida vayronagarchilik koʻlamini koʻzdan kechirgan edi. Hozirda kompaniya ushbu anomaliya sabablarini oʻrganishda davom etmoqda.
“Zamin”ni Telegramʻda oʻqing!
