Shopify: sunʼiy intellekt qidiruvi savdoni oshirmoqda

Elektron tijorat dasturiy taʼminotini ishlab chiqaruvchi Shopify kompaniyasi sunʼiy intellekt texnologiyalarining ommalashuvidan sezilarli darajada foyda koʻra boshladi. ixbt.com maʼlumotiga koʻra, ikkinchi chorakdagi moliyaviy hisobot yigʻilishida kompaniya prezidenti Xarli Finkelshteyn sunʼiy intellekt qidiruvni almashtirayotgani yoʻq, aksincha uning samarali toʻldiruvchisiga aylanib, ayniqsa kichik tovar ishlab chiqaruvchilar va savdogarlarga katta naf keltirayotganini taʼkidladi. Bu haqda Techcrunch.com xabar beradi.

Soʻnggi paytlarda sunʼiy intellektga asoslangan qidiruv tizimlari va xulosalar onlayn nashrlar faoliyatiga salbiy taʼsir koʻrsatib, saytlarga oʻtish koeffitsiyenti va reklama daromadlarining tushib ketishiga sabab boʻlayotgan edi. Biroq Shopify bu borada mutlaqo teskari tendentsiyani kuzatmoqda. Kompaniya yuqori moliyaviy koʻrsatkichlar va daromadlar oʻsishini qisman aynan sunʼiy intellekt qidiruvi bilan bogʻlamoqda.

Moliyaviy muvaffaqiyatlar va savdo oʻsishi

Keltirilgan maʼlumotlarga koʻra, ikkinchi chorakda Shopify doʻkonlariga keluvchi sunʼiy intellekt trafigi va buyurtmalar hajmi oʻtgan yilning mos davriga nisbatan uch baravar koʻpaygan. Qizigʻi shundaki, bu oʻsish anʼanaviy qidiruv tizimlari ulushini kamaytirish evaziga sodir boʻlgani yoʻq. Finkelshteynning soʻzlariga koʻra, anʼanaviy qidiruv hamon xaridorlarni jalb qiluvchi asosiy manbalardan biri boʻlib qolmoqda va u ham oʻsishda davom etmoqda.

Shuningdek, soʻnggi ikki yil ichida anʼanaviy qidiruv seanslari 1,3 barobarga oshib, doʻkonlardagi barcha tashriflarning qariyb uchdan bir qismini saqlab qolgan. Moliyaviy natijalarga kelsak, ushbu davrda kompaniya daromadi 36 foizga oʻsib, 3,6 milliard dollarni tashkil etdi va Wall Street prognozlaridan yuqori keldi. Yalpi operatsion foyda esa 31 foizga oshib, 1,71 milliard dollarga yetdi.

Sunʼiy intellekt nima uchun samara bermoqda?

Shopify rahbariyati sunʼiy intellekt asosidagi qidiruv nima sababdan elektron tijoratda yaxshi ishlayotganini ham tushuntirib oʻtdi. Anʼanaviy qidiruv tizimlari kalit soʻzlar va ommaboplikka tayanib mahsulotlarni reytingga qoʻysa, sunʼiy intellekt agentlari katalog ichiga chuqurroq kirib boradi hamda tuzilgan maʼlumotlar yordamida xaridorning aniq niyatini tushunib ishlaydi.

Misol uchun, xaridor sunʼiy intellekt yordamchisidan sedan mashinasiga mos keladigan eng yaxshi bolalar oʻrindigʻini soʻrasa, anʼanaviy qidiruv faqat «bolalar oʻrindigʻi» kalit soʻziga eʼtibor qaratadi. Sunʼiy intellekt esa oʻlchamlar, avtomobil turi va boshqa barcha talablarni bir vaqtning oʻzida inobatga olgan holda, haqiqatan ham mos keladigan mahsulotni topib beradi. Aynan shu koʻp oʻlchovli qidiruv imkoniyati savdogarlar uchun konversiya koʻrsatkichlarining keskin yaxshilanishini taʼminlamoqda.