“Go‘dak harakatsizmi yoki haddan ortiq tarang?” Mutaxassislar mushak tonusi haqida ogohlantirmoqda

Bolaning harakatlarida g‘alati holatlar sezilyaptimi? Mushak tonusi muammosi bo‘lishi mumkin!
Yangi tug‘ilgan chaqaloqning tinch uxlamasligi, ovqatdan tez-tez qayt qilishi yoki doimiy tarang holatda yotishi ota-onalarda jiddiy xavotir uyg‘otishi kerak. Mutaxassislarning ta’kidlashicha, go‘daklardagi mushak tonusi muvozanatining buzilishi, ya’ni gipertonus yoki gipotonus holatlari bola harakatlari, rivojlanishi va hatto ichki a’zolari faoliyatiga ham salbiy ta’sir ko‘rsatadi.

Gipertonus – tananing haddan tashqari tarangligi
Mushak gipertoniyasi — bu chaqaloq mushaklarining normal holatidan ortiq siqilgan va tarang bo‘lishidir. Bunday go‘daklar odatda qo‘llarini bukib, ko‘kragiga bosgan holatda, mushtlarini qattiq siqib uxlashadi. Hatto uxlash paytida ham bo‘shashish holati kuzatilmaydi. Yuzida qaltirash, sababsiz yig‘i, bezovtalik belgilari ko‘p bo‘ladi.

Gipertonusli bolalarda harakat reflekslari buzilgan bo‘ladi. Masalan, ularning oyoqlari kaftiga emas, barmoqlar uchiga tayangan holatda bo‘ladi. Bunday holat 1,5 oydan keyin yo‘qolishi lozim bo‘lsa-da, gipertonusli go‘daklarda bu hol uzoqroq davom etadi.

Bunday bola o‘z vaqtida emaklamaydi, o‘tirmaydi yoki yurmaydi. Yurishda muvozanatni saqlay olmaydi, tez charchaydi. Uyqusi buziladi, ovqatdan qayt qilishi ko‘payadi — bularning barchasi gipertonusning salbiy oqibatlaridandir.

Gipotonus – mushaklardagi zaiflik va bo‘shashish
Mushak gipotoniyasi esa aksincha — mushaklar yetarlicha tarang emas, bo‘shashgan holatda bo‘ladi. Bunday go‘daklar "qurbaqa holati"da yotadi: qo‘llari tana bo‘ylab yotgan, oyoqlari yon tomonga yozilgan, mushtlari tugilmagan holatda bo‘ladi. Bosh, qo‘l va oyoqlar pastga osilib turadi, harakatlar sust bo‘ladi.

Gipotonusli bolalar odatda kam yig‘laydi, ko‘krakni yaxshi emmaydi, vazni yetarli oshmaydi. Ular boshni ushlay olmaydi, buyumlarni qo‘liga ololmaydi va tengdoshlaridan ancha orqada rivojlanadi. Harakatsizlik tufayli suyak va mushaklar o‘sishi sekinlashadi. Kelajakda esa skolioz, kifoz, qomat buzilishi kabi holatlar yuzaga keladi.

Davo erta boshlanganida — natija yaxshi bo‘ladi!
Yaxshi yangilik shundaki, bolaning asab tizimi tiklanish xususiyatiga ega. Shuning uchun mushak tonusidagi muammo erta aniqlansa, davolash samarali bo‘ladi. Davo usullari qatoriga quyidagilar kiradi:
- Massaj va fizioterapiya (ultratovush, elektroforez, magnitoterapiya);
- Gimnastika va suzish mashg‘ulotlari;
- Ba’zan dori vositalari.

Tajribali mutaxassislar bolalarning harakat holatiga qarab individual muolajalar belgilaydi. Eng muhimi — ota-onalar hushyor bo‘lishi, bolaning har bir harakati, uxlash, ovqatlanish odatlariga e’tibor berishi lozim.

Agar go‘dak harakatsiz yoki g‘alati holatda yotayotgan bo‘lsa, buni «odatiy hol» deb o‘ylamang. Mushak tonusidagi har qanday og‘ish kelajakda jiddiy rivojlanish muammolariga sabab bo‘lishi mumkin. Mutaxassisga vaqtida murojaat qiling — bu bolaning sog‘lom hayoti sari qo‘yilgan muhim qadam bo‘ladi. “Zamin”ni Telegramʻda oʻqing!