Sun’iy tish emas, his qiluvchi tish: kashfiyot!

Olimlar inson tishiga yaqinroq bo‘lgan innovatsion implantlar yaratishdi

Tibbiyot va bioinjeneriya sohasida yana bir muhim yutuq qayd etildi — olimlar nervlar bilan bog‘lanib, haqiqiy tishdek funksiya bajaradigan yangi avlod implantlarini ishlab chiqishdi. Bu “aqlli” tish implantlari nafaqat tashqi ko‘rinishi, balki his qilish qobiliyati bilan ham odatiy tishlarga yaqinlashdi.

Nerv to‘qimalari bilan bog‘lanadi, og‘riqni va haroratni his qiladi

Yangi turdagi implant to‘g‘ridan to‘g‘ri og‘iz bo‘shlig‘idagi to‘qimalarga o‘rnatiladi, ya’ni suyakka burg‘ilab joylashtirish talab etilmaydi. Uning asosi ildiz hujayralaridan iborat bo‘lib, tarkibidagi maxsus oqsil tufayli implant inson organizmidagi mavjud asab to‘qimalari bilan bog‘lanadi. Shu tufayli bunday implant orqali ovqatning haroratini, qattiqlik darajasini va boshqa hissiyotlarni qabul qilish mumkin bo‘ladi.

Hayvonlar ustidan sinov muvaffaqiyatli yakunlandi

Loyiha mualliflarining ma’lum qilishicha, “aqlli implant” ilk bor kemiruvchi hayvonlarda sinab ko‘rilgan. Implantatsiyadan olti hafta o‘tgach, implant to‘liq faoliyat ko‘rsatgan va asab signallarini qabul qilishni boshlagan. Bu esa, uni insonlar uchun klinik sinovlarga tayyorlash bosqichiga olib keladi.

Implantlar tibbiyotda yangi davrni boshlashi mumkin

Mutaxassislar bunday tish implantlari nafaqat estetik, balki funksional jihatdan ham qo‘l kelishini ta’kidlashmoqda. Agar klinik sinovlar muvaffaqiyatli kechsa, kelajakda bu texnologiya nogironlikka olib keluvchi og‘iz bo‘shlig‘i kasalliklarini davolashda katta burilish yasashi mumkin.

Yangi avlod tishlari yaqin yillarda amaliyotga kirishi mumkin

Hozirda ushbu innovatsiya insonlarda sinovdan o‘tkazishga tayyorlanmoqda. Tadqiqotchilarning fikricha, bunday “aqlli” implantlar 3-5 yil ichida stomatologiya amaliyotiga kiritilishi mumkin. Ular nafaqat ko‘rinishda, balki funksiyasi bo‘yicha ham haqiqiy tishlarning o‘rnini bosadi.
“Zamin”ni Telegramʻda oʻqing!