2026 yilda Qurbon hayiti 27 may, chorshanba kuniga to‘g‘ri kelmoqda. Shu munosabat bilan may oyining oxirida o‘zbekistonliklar uchun ketma-ket 5 kunlik dam olish davri boshlanadi.
Ma’lum qilinishicha, 2025 yil 24 dekabr kuni imzolangan prezident farmonida belgilangan sanalarga ko‘ra, 27 maydan 31 maygacha barcha xodimlar uzoq dam olish imkoniga ega bo‘ladi. Bu esa oila davrasida vaqt o‘tkazish, yaqinlarni ziyorat qilish va bayram kayfiyatidan bahramand bo‘lish uchun qulay fursat yaratadi.
Farmonga muvofiq, 28–29 may, ya’ni payshanba va juma kunlari barcha xodimlar uchun qo‘shimcha dam olish kunlari etib belgilangan. 30 may, shanba kuni esa haftasiga 6 kun ishlaydiganlar uchun qo‘shimcha dam olish kuni bo‘ladi. Haftasiga 5 kun ishlaydiganlar uchun esa bu kun odatiy dam olish kuni hisoblanadi.
Shu tariqa, ish haftasi turidan qat’i nazar, may oyi oxirida barcha fuqarolar ketma-ket 5 kun dam oladi.
Dam olish kunlari quyidagicha taqsimlanadi:
27 may, chorshanba — Qurbon hayiti;
28 may, payshanba — barcha uchun qo‘shimcha dam olish kuni;
29 may, juma — barcha uchun qo‘shimcha dam olish kuni;
30 may, shanba — 6 kunlik ish haftasida ishlaydiganlar uchun qo‘shimcha dam olish kuni, 5 kunlik ish haftasida ishlaydiganlar uchun odatiy dam olish kuni;
31 may, yakshanba — barcha uchun odatiy dam olish kuni.
Huquqshunos Xushnudbek Xudoyberdiyevning hisob-kitobiga ko‘ra, 2026 yil may oyi dam olish kunlari soni bo‘yicha so‘nggi yillardagi eng qulay oylardan biri bo‘lishi mumkin.
Uning ta’kidlashicha, may oyida haftasiga 5 kun ishlaydigan xodimlar jami 14 kun, haftasiga 6 kun ishlaydiganlar esa 10 kun dam oladi.
“Bu — so‘nggi yillardagi eng ko‘p dam olish kunlaridan iborat bo‘lgan oy. Yaqin yillarda bunaqasi bo‘lganini eslolmayman”, — deydi huquqshunos.
Darhaqiqat, 2026 yil may oyi ko‘pchilik uchun bayramona va qulay taqvim bilan esda qolishi mumkin. Ayniqsa, Qurbon hayiti kabi muhim diniy bayramning hafta o‘rtasiga to‘g‘ri kelishi va undan keyin qo‘shimcha dam olish kunlari belgilanishi uzoq ta’til muhitini yaratadi.
Bu kunlarda ko‘pchilik oilasi bilan birga bo‘lish, qarindosh-urug‘larni yo‘qlash, ehtiyojmandlarga yordam berish va bayram an’analarini ado etish imkoniga ega bo‘ladi. Qurbon hayiti xalqimiz uchun mehr-oqibat, saxovat va birdamlik ramzi hisoblanadi.
Shu bilan birga, uzoq dam olish kunlari ichki turizm, dam olish maskanlari va xizmat ko‘rsatish sohalari uchun ham faol davr bo‘lishi kutilmoqda. Chunki 5 kunlik ta’til ko‘pchilikka sayohat yoki qisqa muddatli dam olish rejalarini tuzish imkonini beradi.
Qisqasi, 2026 yil may oyining oxiri o‘zbekistonliklar uchun haqiqiy bayramona tanaffus bo‘ladi. Bu safar kalendar ham xalq tomonda — 5 kunlik dam olish, kayfiyatga plyus, ish stresslariga esa kichik “pauza”.
“Zamin”ni Telegramʻda oʻqing!
