Фото: "Дунё" АА
2024 йил 19 декабр куни Вашингтонда Ўзбекистон ва АҚШ ўртасида мамлакатимизнинг Жаҳон савдо ташкилотига аъзо бўлиши доирасида товар ва хизматлар бозорига кириш тўғрисидаги баённома имзоланган. Бу ҳақда “Дунё” ахборот агентлиги хабар бермоқда.
Аввалроқ, ноябр ойи бошида музокаралар ўтказиш бўйича гуруҳлар томонидан ушбу муҳокамаларнинг якунланганлиги эълон қилинган эди.
Тегишли баённома Ўзбекистон Республикаси Бош вазири ўринбосари Жамшид Хўжаев ва АҚШ Савдо вакили Кэтри Тай томонидан имзоланди.
Маросимда Ўзбекистон томонидан президентнинг ЖСТ масалалари бўйича махсус вакили Азизбек Ўрунов, элчи Фурқат Сидиқов, инвестициялар, саноат ва савдо вазири ўринбосари Акрам Алиев ҳамда музокаралар гуруҳи аъзолари иштирок этган.
АҚШ томонидан тадбирга Савдо вакилининг Жанубий ва Марказий Осиё бўйича ўринбосари Брендон Линч, ЖСТ ва кўп томонлама савдо масалалари бўйича ўринбосари Нил Бэк ва бозорга кириш бош музокарачиси Олга Лутчин қатнашган.
Тадбирда томонлар эришилган келишувларнинг аҳамиятини алоҳида таъкидлаб, музокараларнинг муваффақиятли якунланиши икки мамлакатнинг кўп томонлама савдо тизими, адолатли ва шаффоф савдо қоидаларга асосланган муносабатларга содиқлигини қайд этган.
Имзолаш маросими якунида томонлар яна бир бор Ўзбекистоннинг ЖСТга аъзо бўлиш жараёнини тезлаштириш, жумладан, кўп томонлама музокаралар ва қишлоқ хўжалигини давлат томонидан қўллаб-қувватлаш шартларини мувофиқлаштириш доирасида ҳамкорликни жадаллаштиришини тасдиқлаган.
Таъкидлаш лозим, Ўзбекистоннинг ЖСТга аъзо бўлиш жараёни доирасида АҚШ – бозорга кириш бўйича икки томонлама музокаралар якунланган 21-давлат бўлган эди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
