Шавкат Мирзиёев Россия ташқи ишлар вазири Сергей Лавровни қабул қилди

23 апрель куни Ўзбекистон Республикаси президенти Шавкат Мирзиёев мамлакатимизга амалий ташриф билан келган Россия ташқи ишлар вазири Сергей Лавров ва унинг ҳамроҳларини Самарқанд шаҳрида қабул қилди.

Мулоқот бошида Россиянинг юқори мартабали вакили давлат раҳбари Шавкат Мирзиёевга Россия Федерацияси президенти Владимир Путиннинг самимий саломлари ва энг эзгу истакларини етказди.

Учрашувда икки давлат ўртасидаги кўп асрлик дўстлик, ҳар томонлама стратегик шериклик ва иттифоқчилик муносабатларини янада мустаҳкамлаш ҳамда давлат раҳбарлари даражасидаги учрашувлар давомида эришилган келишувларнинг амалга оширилишига оид энг муҳим масалалар атрофлича муҳокама қилинди.

Ўзаро муносабатларда барча соҳаларда юқори даражадаги алоқалар ва самарали ҳамкорлик фаол давом этаётгани таъкидланди. Мамлакатлар ўртасидаги товар айланмаси ва инвестициялар ҳажми барқарор ўсиб бормоқда. Икки давлат ҳудудлари ҳамда йирик саноат корхоналари ўртасидаги ўзаро ҳамкорлик алоқалари янги босқичга кўтарилмоқда.

Шунингдек, маданият ва санъат соҳаларидаги алоқалар, фан ва таълимдаги ҳамкорлик, соғлиқни сақлаш ва спорт йўналишидаги қўшма лойиҳалар, туризм йўналишидаги шериклик муносабатлари янада фаоллашиб бораётгани юқори баҳоланди.

Бундан ташқари, минтақавий ва халқаро аҳамият касб этувчи айрим долзарб масалалар юзасидан ҳам фикр алмашилди.

Мулоқот самимий, очиқ ва конструктив руҳда бўлиб ўтди. Томонлар Ўзбекистон ва Россия ўртасидаги иттифоқчилик муносабатларини янада ривожлантириш ва мустаҳкамлаш йўлидаги келишувларни давом эттиришга келишиб олишди. «Замин»ни Telegram’да ўқинг!