Модулли меҳмонхоналарга субсидия оширилди: туризмда янги босқич бошланди

Ўзбекистонда туризм инфратузилмасини янада ривожлантириш, ички ва ташқи сайёҳлар оқимини ошириш мақсадида давлат томонидан яна бир муҳим қадам қўйилди — модулли меҳмонхоналарни қуришга ажратиладиган субсидиялар миқдори сезиларли даражада кўпайтирилди. Бу президентнинг “2025–2026 йилларда сайёҳлар оқимини кескин кўпайтириш ва туристик хизматлар кўламини жадал кенгайтириш орқали туризмнинг иқтисодиётдаги ўрни ва аҳамиятини ошириш чора-тадбирлари тўғрисида”ги фармонида белгиланди.

Модулли меҳмонхоналарга 1 марталик субсидиялар:

2027 йил 1 январгача камида 10 та модулдан иборат меҳмонхоналарга қуйидаги миқдорларда давлат томонидан ёрдам кўрсатилади:

- I тоифа учун – ҳар бир жойга 10 млн сўм;
- II тоифа учун – ҳар бир жойга 7 млн сўм;
- III тоифа учун – ҳар бир жойга 5 млн сўм.

Эслатиб ўтамиз, аввалги ҳужжатга кўра, 2026 йил 1 ноябргача барча тоифалар учун ягона тартибда ҳар бир жойга 1 млн сўм субсидия ажратилиши белгиланган эди. Янги фармонда бу меъёрлар сезиларли даражада кенгайтирилди.

Тиббий туризмга ҳам жиддий эътибор

2028 йил 1 январгача тиббий туризм кластерлари ходимларининг малака ошириш харажатлари бир қисмини давлат қоплаб беради.

2030 йилгача ушбу кластерлар хизматлари халқаро туризм ва тиббиёт кўргазмаларида фаол тарғиб қилинади.

Янги платформалар ва ғолиблар учун саёҳат

2025 йилдан бошлаб барча давлат электрон тизимлари Миллий туризм ягона платформаси доирасида бирлаштирилади.

Самарқанд шаҳрида “Ипак йўлида туризм” номли тематик офис очилади.

Ёшлар ўртасидаги спорт мусобақалари ғолиблари “Ўзбекистон бўйлаб саёҳат” йўлланмалари билан рағбатлантирилади.

Zamin.uz таҳририятидан:
Ушбу фармон Ўзбекистонда туризмни кенг қамровли ислоҳотлар йўлига олиб чиқишда муҳим роль ўйнайди. Меҳмонхона инфратузилмасини кучайтириш, тиббий туризмни оммалаштириш ва ёшлар саёҳатини рағбатлантириш орқали мамлакат сайёҳлар учун янада жозибадор марказга айланиши мумкин.

Сиз қандай ўйлайсиз, модулли меҳмонхоналар туризм тармоғига қандай самара беради? «Замин»ни Telegram’да ўқинг!