Тошкент шаҳар жамоат транспортида йўл ҳақини тўламай ҳаракатланиш ҳолатлари ортиб бораётгани аниқланди. Транспорт соҳасидаги назоратчи ташкилотлар томонидан 2025 йилнинг январидан июнигача бўлган вақт мобайнида 4090 нафар йўловчи автобусларда пул тўламай юргани учун қўлга олинган.
Транспорт вазирлиги ва Жамоат транспортида ҳаракатланиш мониторинги ва назорати давлат муассасаси ҳамкорлигида ўтказилган кенг қамровли рейдлар натижасида мазкур ҳолатлар фош қилинди.
Аниқланишича, кўп ҳолларда айбдор шахслар чипта олмасдан кириб кетиш ёки автобуснинг орқа эшикларидан фойдаланиш орқали назоратдан четлаб ўтмоқчи бўлган. Лекин, транспорт назорати кучайтирилгани туфайли уларнинг айби ҳужжатлаштирилиб, тегишли тартибда жаримага тортилиши таъминланган.
Қонунга кўра, йўл ҳақини тўламай жамоат транспортидан фойдаланган шахсларга нисбатан белгиланган жарима — 41 200 сўм. Бу, айни вақтдаги бир марталик автобус чиптаси нархидан тахминан 25 баробар кўпдир. Яъни, бир чиптадан “тежайман” деб ҳаракат қилган йўловчи, қонунбузар сифатида жиддий маблағдан айрилиши мумкин.
Масъул идоралар жамоат транспортида фақат чипта орқали ҳаракат қилиш маданиятини шакллантириш зарурлигини таъкидлашмоқда. Чунки ҳар бир чипта — нафақат шахсий масъулият, балки бутун шаҳар транспорти тизими учун молиявий таянч ҳисобланади.
Шу билан бирга, Тошкент шаҳар жамоат транспортидаги камера ва электрон назорат тизимлари орқали назоратни янада автоматлаштириш ишлари олиб борилаётгани маълум қилинди. Бу эса, ҳар қандай айланма йўллар ва “мураккаб найранглар”ни вақтида фош этиш имконини беради.
Охир-оқибат, жамоат транспортидан адолатли ва тенг фойдаланиш, фуқаролик жавобгарлиги ва қонунга бўлган ҳурматдан бошланади. Битта чипта олиш билан сиз наfaqat ўзингизни, балки бутун тизимни қўллаб-қувватлайсиз.
«Замин»ни Telegram’да ўқинг!
