Ўзбекистон Президенти Шавкат Мирзиёев келаси ой Европага сафар қилиши кутилмоқда. Расмий маълумотларга кўра, давлат раҳбари 24 октябрь куни Бельгия пойтахти Брюсселда бўлади. Бу ҳақида Европа кенгаши Президенти Антониу Кошта Шавкат Мирзиёевга йўллаган табрикномасида таъкидлаган.
Маълумотларга кўра, сафар давомида Европа Иттифоқи ва Ўзбекистон ўртасидаги муносабатларда янги босқични белгилайдиган муҳим ҳужжат — Кенгайтирилган шериклик ва ҳамкорлик тўғрисидаги битим имзоланиши кутилмоқда.
Антониу Кошта ўз мактубида:
“Сиз билан 2025 йил 24 октябрь куни Брюсселда бўлиб ўтадиган учрашувни интиқлик билан кутаман. У ерда Европа Иттифоқи ва Ўзбекистон ўртасидаги ҳамкорликни янада чуқурлаштириш имкони пайдо бўлади”, — дея қайд этган.
Шунингдек, Европа кенгаши раҳбари ўтган апрель ойида Самарқандда бўлиб ўтган “Европа Иттифоқи – Марказий Осиё” биринчи саммити ҳақида ҳам тўхталди. У ўша ташриф давомида ўзбек халқига хос самимийлик ва меҳмондўстликни ҳис этганини, бу воқеа унда ёрқин хотиралар қолдирганини таъкидлаган.
Шу тариқа, Брюсселдаги октябрь учрашуви нафақат сиёсий мулоқот, балки Европа ва Ўзбекистон муносабатларида янги саҳифа очиши кутилаётган муҳим воқеа сифатида баҳоланмоқда.
«Замин»ни Telegram’да ўқинг!
