Тошкент шаҳрида жамоат транспортида йўл ҳақини тўламасдан ҳаракатланган йўловчиларга нисбатан қаттиқ чоралар кўрилмоқда. Транспорт вазирлиги маълумотларига кўра, йил бошидан бери пойтахтда 6 мингдан зиёд қоидабузар йўловчи жаримага тортилган.
Ресми рақамларга қараганда, Транспорт назорати инспекцияси ва Тошкент шаҳар жамоат транспортини мониторинг ва назорат қилиш муассасаси ходимлари автобусларда мунтазам текширувлар ўтказмоқда. Ушбу рейдлар давомида 6 182 нафар шахс йўл ҳақини тўламасдан сафар қилгани учун жавобгарликка тортилиши қайд этилган.
Маъмурий жавобгарлик тўғрисидаги кодекснинг 144-моддасига мувофиқ, шаҳар ичида ва шаҳар атрофига қатнайдиган автобусларда чиптасиз юриш базавий ҳисоблаш миқдорининг ўндан бир қисми миқдорида жарима солинишига олиб келади.
Масъуллар таъкидлашича, рейдларнинг асосий мақсади фуқароларнинг қонунга риоя қилиши ва жамоат транспорти тизимида адолатли тартибни таъминлашдан иборат. Чунки ҳар бир йўловчининг чипта учун тўлов қилиши нафақат тизим барқарорлиги, балки хизмат кўрсатиш сифатини яхшилашда ҳам муҳим аҳамият касб этади.
Статистик маълумотларга кўра, жорий йилнинг январ ойида АТТО транспорт ва виртуал карталари орқали 15,2 миллион тўлов амалга оширилган. Шундан 11,7 миллиони автобусларда, қолган 3,5 миллиони эса метрополитенда рўйхатдан ўтган. Шу тариқа, йўловчилар ўтган ой давомида тарифлар орқали тахминан 3,2 миллиард сўмни тежашга муваффақ бўлишган.
Мутахассислар фикрича, чиптасиз ҳаракат қилиш нафақат қонунбузарлик, балки бутун жамоат транспорти тизимига зарар етказади. Шу боис аҳолига қоидаларга риоя қилиш, электрон карталардан фойдаланиш ва тўловларни ўз вақтида амалга ошириш қатъий тавсия этилмоқда.
«Замин»ни Telegram’да ўқинг!
