Ўзбекистон президенти Шавкат Мирзиёев ва Boeing Global компанияси президенти Брендан Нелсон Ню-Йорк шаҳрида учрашув ўтказиб, икки давлатнинг стратегик ҳамкорлигига янги қадам қўйди. Бу воқеа дунёдаги энг йирик авиация ва космик техника ишлаб чиқарувчи компаниялардан бири бўлган Boeing билан Ўзбекистоннинг ўзаро ҳамкорлигини янада мустаҳкамлайди.
Boeing компаниясининг Ўзбекситон билан кейинги йиллардаги ҳамкорлиги кўп йиллик тарихга эга. Ҳозирда Ўзбекистон ушбу компаниянинг муҳим ва стратегик ҳамкори ҳисобланади. Президент Мирзиёев ушбу ҳамкорликнинг самарадорлигини ва тўғри йўналишда давом эттирилишини алоҳида таъкидлади. Мавжуд шартнома асосида, Ўзбекистоннинг авиакомпанияси "Uzbekistan Airways" ва Boeing ўртасида янги самолётларни етказиб беришга доир келишув имзоланди. Ушбу битимнинг аниқ мақсади - мамлакатнинг ҳаво транспорти тизимини яхшилаш ва замонавий авиатехника билан таъминлаш.
Шунга асосан, янги шартнома доирасида Uzbekistan Airways 8 миллиард долларлик улкан инвестиция маблағлари эвазига Boeing компаниясидан 22 та 787 Dreamliner самолётини харид қилишни маъқуллади. Бу муҳим келишув Ўзбекистон учун катта иқтисодий аҳамиятга эга, чунки у нафақат мамлакатнинг транспорт соҳасини ривожлантиришга ёрдам беради, балки Қўшма Штатларда 35 000 дан ортиқ иш ўринларини яратади.
Мирзиёевнинг ташрифи давомида АҚШ президенти Дональд Трамп ҳам ушбу битимни юқори баҳолади ва ўз саҳифасида "Шу ой бошида мен Ўзбекистон президенти ҳурматли Шавкат Мирзиёев билан суҳбатлашган эдим. Бугун мен президент Мирзиёевни Boeing билан улкан битим имзолангани билан табриклайман! Uzbekistan Airways 8 миллиард доллардан ортиқ маблағ эвазига 22 та 787 Dreamliner самолётини харид қилади. Бу Қўшма Штатларда 35 000 дан ортиқ иш ўринларини яратади. Президент Мирзиёев - бир сўзли инсон ва биз бошқа кўплаб масалалар устида биргаликда ишлашда давом этамиз! Бу масалага эътиборингиз учун ташаккур", - деб ёзди. Трамп мазкур битимнинг икки давлат ўртасидаги стратегик ҳамкорликни янада мустаҳкамлашда муҳим роль ўйнашини таъкидлади.
Мирзиёев ва Трампнинг ҳамкорлигига эътибор қаратилган бу учрашув, Ўзбекистоннинг глобал иқтисодий майдондаги ўрнини янада мустаҳкамлаш ва мамлакатнинг халқаро ҳамкорлар билан муносабатларини янада кучайтиришга хизмат қилади. Шунингдек, Ўзбекистоннинг авиация соҳасидаги ривожланиш бўйича яна бир муҳим қадам ташланди.
«Замин»ни Telegram’да ўқинг!
