Миллий статистика қўмитаси маълумотларига кўра, 2024/2025 ўқув йилида Ўзбекистон олий таълим муассасаларига 381,7 мингдан зиёд талаба қабул қилинган. Бу рақам 2020/2021 йилга нисбатан 2,2 баробар кўпдир, деб хабар берди қўмита матбуот хизмати.
Жорий ўқув йилида қабул қилинганларнинг 196,7 минг нафари қизлар, 185 минг нафари эса ўғил болалардир. Демак, олий таълимда таҳсил олаётган қизлар сони йигитларникидан 12 минг нафарга кўп.
Ҳудудлар бўйича энг кўп талаба Тошкент шаҳри ҳиссасига тўғри келмоқда — бу ерда 155,2 мингдан ортиқ ёшлар олий таълимда таҳсил олмоқда. Кейинги ўринларда Бухоро (31,5 минг), Тошкент вилояти (27 минг) ва Самарқанд (21,2 минг) вилоятлари жойлашган.
Энг кам кўрсаткич эса Сирдарё вилоятида қайд этилган — бу ерда ҳаммаси 5,3 мингга яқин талаба таҳсил олмоқда. Шу билан бирга, Жиззах (6,3 минг), Навоий (9,2 минг) ва Андижон (12,5 минг) вилоятларида ҳам талабалар сони нисбатан кам.
Мутаҳассислар фикрича, сўнгги йилларда олий таълим муассасалари сонининг ошиши, қабул квоталарининг кенгайиши ва таълим имкониятларининг яхшиланиши ёшлар орасида олий таълимга бўлган қизиқишни сезиларли даражада кучайтирди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
