Озарбойжон президенти Илҳом Алиев ЎзАга берган интервьюсида икки давлат ўртасидаги алоқаларни “қардошликка таянган мустаҳкам иттифоқ” деб атади. Унинг таъкидлашича, Ўзбекистон ва Озарбойжонни бир аср ёки икки аср эмас — минг йиллар давомида шаклланган умумий руҳ, умумий тарих ва миллий яқинлик боғлаб келган.
Алиевнинг фикрича, икки халқни бирлаштирувчи омиллар жуда кўп: ўхшаш тил, урф-одат, ижтимоий қадриятлар, маданий мерос ва энг муҳими — доимий тарзда сақланиб келган бир-бирига нисбатан самимий ҳурмат. Президент бу муносабатлар бугун юқори поғонага — иттифоқчилик даражасига кўтарилганини мамнуният билан қайд этди.
Озарбойжон раҳбари Ўзбекистоннинг доимий равишда Бокунинг ҳудудий яхлитлигини ҳимоя қилиб келганини алоҳида таъкидлади. Унинг айтишича, бу сиёсий қўллаб-қувватлаш икки мамлакат ўртасидаги ишонч мустаҳкам эканининг асосий исботларидан бири.
Алиев интервью давомида Ўзбекистоннинг Қорабоғни тиклаш жараёнидаги бунёдкорона иштироки учун самимий миннатдорлик билдирди. Айниқса, Фузулий шаҳрида қурилиб, бугунги кунда тахминан 600 нафар болага хизмат қилаётган Мирзо Улуғбек номли мактаб — бу дўстликнинг ҳаётий намунаси эканини таъкидлади.
Унинг сўзларига кўра, Қорабоғни қайта тиклашга ёрдам бериш ташаббуси билан чиққан биринчи давлат айнан Ўзбекистон бўлган. Бу қадам Озарбойжон жамоатчилиги томонидан ҳамиша чуқур ҳурмат ва самимий миннатдорлик билан эслаб келинади.
Алиев фикрини якунлар экан, икки халқ ўртасидаги биродарлик руҳи келажакда ҳам янада мустаҳкамланиб, янги қўшма лойиҳалар ва стратегик ҳамкорлик ташаббуслари учун кенг йўл очишини таъкидлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
