Самарқанд янада улкан шаҳарга айланмоқда. Президент матбуот хизмати раҳбари Шерзод Асадов маълумотига кўра, Оқдарё, Пайариқ, Пастдарғом, Тойлоқ ва Самарқанд туманларидан жами 17,5 минг гектар ер шаҳри ҳудудига қўшилади. Шу орқали аҳоли сони 604 мингдан 882 минг нафаргача ошиши кутиляпти.
Янгиланган шаҳар эҳтиёжини қондириш мақсадида учта йирик массив — «Ширин», «Темирйўл орти» ва «Қорасув-2»да 700 дан ортиқ кўп қаватли уйлар қурилиб, 300 мингдан зиёд аҳолига замонавий шароит яратилади.
Бу ҳудудларда мактаб, болалар боғчаси, шифохона, олийгоҳ, савдо ва бизнес марказлари, меҳмонхона, ресторан ҳамда дам олиш масканлари бунёд этилиши режалаштирилган.
Шу билан бирга, келаси йили 49 та вилоят ташкилоти «Ширин» массивига кўчирилади. Йил охиригача «Қорадарё» устидан ўтган 577 метрли кўприк фойдаланишга топширилиб, янги массивнинг марказ билан боғланиши енгиллашади.
Испаниялик инвесторлар билан ҳамкорликда ушбу уч массивнинг канализация тизими тўлиқ янгиланади. Юк ҳаракатини чеклаш мақсадида эса магистраль йўл бўйлаб 4 та логистика марказининг қурилиши режада.
Самарқанд шаҳарининг бу кенгайиши — аҳолиси тез ўсиб бораётган қадимий шаҳарни янада қулай, замонавий ва имкониятларга бой мегаполисга айлантиришга қаратилган муҳим қадам сифатида баҳоланмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
