Қамбарота ГЭС лойиҳаси бўйича музокаралар янги босқичга ўтди

Фото: Ўзбекистон Республикаси Энергетика вазирлиги

Тошкент шаҳрида Ўзбекистон ва Қирғизистон ўртасида энергетика соҳасидаги йирик стратегик ташаббус — “Қамбарота ГЭС-1” лойиҳаси юзасидан навбатдаги музокаралар бўлиб ўтди. Учрашувда икки давлат Энергетика вазирликлари вакиллари, шунингдек тегишли давлат идоралари ва соҳавий ташкилотлар мутахассислари иштирок этди.

Мазкур мулоқотда ҳукуматлараро битим лойиҳасини ишлаб чиқиш ва унинг асосий қоидаларини келишиш масалалари атрофлича муҳокама қилинди. Жараёнда халқаро молиявий институт — Жаҳон банки вакиллари ҳам кузатувчи сифатида қатнашиб, лойиҳанинг аҳамияти ва шаффофлигини таъминлашга алоҳида эътибор қаратилди.

Учрашув якунида томонлар келишувга эришиш йўлида ўзаро мулоқот ва ҳамкорликни янада кучайтиришга тайёр эканликларини билдирди. Бу эса лойиҳани амалга ошириш жараёни босқичма-босқич олдинга силжишини англатади.

“Қамбарота ГЭС-1” Марказий Осиё миқёсидаги муҳим энергетик ташаббуслардан бири ҳисобланади. У Қирғизистон ҳудудида жойлашган Норин дарёсида қуввати 1880 мегаватт бўлган замонавий гидроэлектр станциясини барпо этишни назарда тутади. Ушбу лойиҳа нафақат электр энергияси ишлаб чиқариш ҳажмини ошириш, балки сув ресурсларидан самарали фойдаланиш ва минтақада энергетик барқарорликни таъминлашга хизмат қилади.

Шу билан бирга, бу каби йирик инфратузилмавий лойиҳалар Ўзбекистон ва Қирғизистон ўртасидаги стратегик ҳамкорликни мустаҳкамлаб, минтақавий интеграция жараёнларини янада тезлаштириши кутилмоқда.