Ўзбекистонда оила институтини қўллаб-қувватлаш ва оталарнинг фарзанд тарбиясидаги иштирокини кучайтиришга қаратилган янги ташаббус муҳокама қилинмоқда. Олий Мажлисда кўриб чиқилаётган қонун лойиҳасига мувофиқ, энди ишловчи эркакларга фарзанди дунёга келганида қисқа муддатли ҳақ тўланадиган таътил бериш режалаштирилмоқда.
Қонун ташаббуси қабул қилинса, янги туғилган чақалоқ парвариши даврида оталар ҳам расман оиласи ёнида бўлиш имкониятига эга бўлади.
Лойиҳада белгиланишича, ишловчи эркакларга 5 иш кунидан иборат қўшимча таътил ажратилиши мумкин. Ушбу давр мобайнида ходимнинг иш жойи сақлаб қолинади ва ўртача иш ҳақи ҳам тўлиқ тўланади.
Ташаббус муаллифлари фикрича, бу янгилик аввало ёш оилаларни қўллаб-қувватлашга хизмат қилади. Чунки фарзанд туғилган илк кунларда она ва чақалоқ алоҳида эътибор ҳамда ёрдамга муҳтож бўлади.
Қонун лойиҳасида таъкидланишича, мазкур таътилнинг асосий мақсади — янги туғилган болага қараш, турмуш ўртоғига кўмаклашиш ва оиладаги бошқа фарзандларга ҳам етарли вақт ажратиш имконини яратишдан иборат.
Мутахассислар фикрича, бу каби ижтимоий кафолатлар нафақат оилавий муносабатларни мустаҳкамлайди, балки оталарнинг фарзанд тарбиясидаги масъулияти ва иштирокини ҳам оширишга хизмат қилади.
Кўплаб ривожланган давлатларда бундай амалиёт аллақачон жорий қилинган бўлиб, у оиладаги психологик муҳит ва бола тарбиясига ижобий таъсир кўрсатиши таъкидланади.
Ҳозирча қонун лойиҳаси муҳокама босқичида турибди. У тўлиқ қабул қилиниши учун парламентнинг кейинги босқичларидан ўтиши талаб этилади. Агар ташаббус қўллаб-қувватланса, Ўзбекистонда ишловчи оталар учун янги ижтимоий имтиёзлардан бири пайдо бўлади.
“Zamin”ни Telegram'да ўқинг!
