Тошкентнинг Амир Темур кўчасидаги автобус пойгалари ЙТҲлар сони ошишига сабаб бўлмоқда

Тошкент шаҳрида жамоат транспорти иштирокида 2014 йилнинг дастлабки ўн ойи давомида содир этилган йўл-транспорт ҳодисаларнинг энг кўпи Юнусобод туманида қайд этилди. Бу ҳақда «Пойтахт транспорти» газетасига асосланиб «Kun.uz» хабар бермоқда.

Қайд этишларича, Юнусободда содир этилган ҳодисалар сони 14та бўлиб, жами ЙТҲларнинг 21 фоизини ташкил қилмоқда. ЙТҲлардан 7таси туманнинг Амир Темур, яна 3таси Аҳмад Дониш кўчасида содир этилган.

«Буни Амир Темур кўчаси орқали ҳаракатланувчи автобусларнинг тезликни меъёридан ошириб ҳаракатланишлари, алоҳида йўл тасмаси ажратилганлигига қарамасдан ҳар хил йўналишлардаги автобуслар бир-бирлари билан «пойга» ўйнашлари, куннинг тиғиз вақтида транспорт воситалари оқими кўпайиши ҳамда тирбандликлар вужудга келаётганлиги билан изоҳлаш мумкин», – дейди «Тошшаҳартрансхизмат» компанияси Йўловчи транспортида ҳаракат хавфсизлигини таъминлаш хизмати бошлиғи Муҳаммаджон Қаҳҳоров.

Фото: kun.uz