Хитойнинг XPeng компанияси 2026-йилда дунёдаги илк оммавий учувчи автомобилларни ишлаб чиқаришни бошлашни режалаштирмоқда, деб Xinhua агентлиги хабар берди.
Компания бош директори Хэ Сяопэннинг сўзларига кўра, XPeng бу режани Хитойда паст баландликда парвоз қилувчи транспорт воситалари бозорининг ривожланиши ва ҳукумат томонидан қўллаб-қувватланиши фонида амалга оширишни мўлжалламоқда. Агар барча ишлар режалаштирилган тартибда давом этса, XPeng дунёда биринчи бўлиб учувчи автомобилларни оммавий ишлаб чиқарувчи компанияга айланади.
Хитойнинг 2025-йил учун иқтисодий ва ижтимоий ривожланиш режасига кўра, мамлакатда паст баландликда парвоз қилувчи транспорт воситаларининг қўлланилишини кенгайтириш режалаштирилган. Шу билан бирга, хавфсизлик чораларини кучайтириш ва хавфларни бартараф этиш бўйича ҳам иш олиб борилади.
XPeng вакилларининг маълум қилишича, 2024-йил охирида компания учувчи автомобиллар ишлаб чиқариш заводининг қурилишини 2025-йилнинг учинчи чорагида якунлашни режалаштирган. Шунингдек, XPeng Aeroht модулли автомобилининг олдиндан сотувларини 2024-йил охирида бошлаш мўлжалланган. Ушбу автомобиль багажидан учувчи қурилма чиқиб, икки кишини ҳавога кўтариш имкониятига эга бўлади.
Мазкур автомобилнинг дастлабки нархи 1-2 миллион юань (тахминан 138-276 минг АҚШ доллари) атрофида бўлиши кутилмоқда. Дастлаб у Хитой бозорида сотувга чиқарилиб, кейинчалик халқаро бозорга ҳам етказилиши режалаштирилган. Компания харидорларга етказиб беришни 2025-йилнинг тўртинчи чорагида бошлашни мақсад қилган.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
