Ducati ва Lamborghini 1 млрд сўмлик мотоцикл тақдим қилди

Ducati ва Lamborghini ҳамкорлигида ишлаб чиқилган эксклюзив Ducati Panigale V4 Lamborghini мотоцикли $78,400 ёки 1 миллиард сўмдан ортиқ нархда тақдим этилди, деб kursiv.media хабар берди.

Бу миқдорга Ўзбекистонда 7 та Chevrolet Cobalt олиш мумкин. Ҳар бир Cobalt автомобилининг бошланғич нархи 146,4 миллион сўмдан бошланади.

Мотоциклнинг фақатгина 630 нусхаси ишлаб чиқарилади. Янги байк Lamborghini Revuelto автомобилидан илҳомланган, корпуси карбон панеллардан иборат. Уни 1,1 литрли мотор ҳаракатга келтиради.

Automobili Lamborghini компанияси раҳбари Стефан Винкельманн: “Бу ҳамкорлик орқали Ducati Revuelto'нинг спорт характери ва эксклюзивлигини мукаммал ифода эта олди”, — деди.

Мотоциклнинг муҳаррик қуввати 1000 от кучидан ортиқ, максимал тезлиги — 350 км/соат. 100 км/соат тезликка 2,5 сонияда етади.