BMW компаниясининг АҚШдаги бўлинмаси янги BMW iX3 50 хДриве электр кроссоверининг техник кўрсаткичларини эълон қилди. ЭПА баҳолаш тизимига кўра, мазкур модел бир марта қувватланиш орқали 700 километргача масофани босиб ўта олади. Бироқ, бу кўрсаткич танланган шиналарга боғлиқ: 20-дюймли ёзги шиналар билан 700 км масофани забт этиш мумкин бўлса, мавсумий шиналар билан бу кўрсаткич 615 км атрофида бўлади. Бу ҳақда Ixbt.com хабар беради.
Янги моделнинг нарх сиёсати ҳам эътиборга молик. Электр двигателли BMW iX3 50 хДриве 62 850 доллардан бошланса, бензинли BMW X3 М50 хДриве 67 850 долларни ташкил этади. Қизиғи шундаки, электр версия 463 от кучига эга бўлиб, бензинли вариантдаги 393 от кучидан сезиларли даражада устунроқдир.
Автомобилнинг яна бир муҳим афзаллиги — 400 кВт қувватгача бўлган ўта тезкор қувватлаш тизимини қўллаб-қувватлаши. Компания маълумотларига кўра, бу технология атиги 10 дақиқа ичида 300 км масофага етарли қувват тўплаш имконини беради. Бу кўрсаткич билан BMW ўзининг асосий рақобатчиси Tesla Model Y моделидан ҳам устунлик қилмоқда.
Ҳозирги кунда АҚШ бозорида BMW iX3 50 хДриве учун буюртмалар қабул қилинмоқда. Мижозлар автомобилни брон қилиш учун 1000 доллар миқдорида депозит тўлашлари керак. Янги кроссоверларнинг илк эгаларига етказиб берилиши сентябрь ойидан бошланиши режалаштирилган.
“Zamin”ни Telegram'да ўқинг!
