Уляновск автомобил заводи бош директори Илнур Сахабиев ўзининг “VK Видео” каналида янгиланган УAZ Патриот моделининг расмий видеоролигини намойиш этди. Завод раҳбари ушбу йўлтанламас жорий йилнинг куз фаслида бозорга чиқишини тасдиқлади. Бу ҳақда Ixbt.com хабар беради.
Маълум қилинишича, кузда бир йўла учта янгилик тақдим этилади: янгиланган Патриот моделидан ташқари, модернизация қилинган Piкап ва Proфи моделлари ҳам сотувга чиқади. Видеода йўлтанламаснинг янги дизайндаги рул чамбараги ва олд панели яқиндан кўрсатилган.
Салонда янги 6 поғонали механик узатмалар қутиси дастаги ҳамда раздатка бошқаруви учун мўлжалланган айланма селектор яққол кўзга ташланади. Шунингдек, иқлим назорати блоки ва орқа ўриндиқдаги йўловчилар учун кўплаб USB портлар ўрнатилгани маълум бўлди.
Техник жиҳатдан янгиланган УAZ Патриот 150 от кучига эга 2,7 литрли ЗМЗ Pro бензинли двигатели ҳамда 136 от кучи берадиган янги 2,0 литрли турбодизел мотор билан жиҳозланади. Ҳар иккала куч агрегати янги 6 поғонали “механика” билан бирга ишлайди.
Аввалроқ тарқалган маълумотларга кўра, автомобил 9 дюймли экранли янги медиасистема ва тўлиқ светодиодли оптикага эга бўлиши кутилмоқда.
“Zamin”ни Telegram'да ўқинг!
