Франциянинг Peugeot бренди Буюк Британия бозоридаги барча моделлар қатори учун нархларни сезиларли даражада пасайтирди. Компания ўз автомобилларини кенгроқ мижозлар қатлами учун очиқроқ қилиш мақсадида нархларни 10 000 фунт стерлинггача арзонлаштирганини эълон қилди. Ушбу ўзгаришлар бензинли, гибрид ва тўлиқ электр қуввати билан ҳаракатланувчи моделларга тааллуқлидир. Бу ҳақда Autocar.co.uk хабар беради.
Энг катта чегирма Peugeot э-3008 электр кроссоверида кузатилди. 73 кВ/соат аккумулятор ва 207 от кучига эга двигател билан жиҳозланган ушбу моделнинг нархи 46 060 фунтдан 36 995 фунтга туширилди. Шунингдек, нархнинг 37 000 фунтдан пастга тушиши автомобилга қўшимча 1500 фунтлик давлат грантини олиш имконини беради, натижада умумий чегирма 23 фоизни ташкил этади.
Каттароқ ҳажмдаги етти ўринли Peugeot э-5008 модели ҳам 8000 фунтга арзонлашиб, эндиликда 40 595 фунт стерлингдан сотилмоқда. Нархларнинг пасайиши кўплаб моделларни йиллик транспорт солиғи (ВEД) бўйича имтиёзли тоифага ўтказди, бу эса эгаларига олти йил давомида яна 2200 фунт тежаш имконини беради.
Бундан ташқари, Peugeot 208, 2008, 3008 ва 5008 моделларининг гибрид версиялари 2000 дан 3500 фунтгача арзонлашди. Электрли Peugeot э-208 ва Peugeot э-2008 хетчбек ҳамда кроссоверлари учун эса мос равишда 5000 ва 6000 фунтгача чегирмалар тақдим этилмоқда.
Peugeot компаниясининг бошқарувчи директори Никола Добсоннинг таъкидлашича, ушбу стратегик қадам бренднинг бозордаги мавқеини мустаҳкамлайди. Унинг сўзларига кўра, нархларнинг туширилиши ҳам жисмоний шахслар, ҳам корпоратив мижозлар учун замонавий дизайн ва инновацион технологияларга эга автомобилларни янада ҳамёнбоп қилади.
“Zamin”ни Telegram'да ўқинг!
