Хитой автомобиль ишлаб чиқарувчилари Европа электромобиль бозорида ўз таъсирини кескин оширмоқда. Апрель ойида Хитой брендларига тегишли электромобиллар савдоси икки баравардан кўпроқ ўсиб, 38 минг донага етди.
Бу натижа хитойлик компанияларга Европадаги электромобиллар бозорининг 15 фоиздан ортиқ қисмини эгаллаш имконини берди. Bloomberg маълумотларига кўра, Хитой автокомпаниялари нафақат электромобиль сегментида, балки Европа автомобиль бозорининг умумий ҳажмида ҳам 10 фоизлик улушга яқинлашмоқда.
Айниқса, ташқи манбадан қувватланадиган гибрид автомобиллар йўналишида Хитой брендлари анча фаол. Ушбу сегментда уларнинг улуши қарийб 29 фоизни ташкил этган. Бу эса Европа харидорлари орасида Хитойда ишлаб чиқарилган гибрид ва электромобилларга қизиқиш ортиб бораётганини кўрсатади.
Мутахассисларга кўра, Хитой автокомпанияларининг Европа бозорига фаол кириб боришига ички бозордаги кучли нарх рақобати ва фойданинг камайиши сабаб бўлмоқда. Шунинг учун ишлаб чиқарувчилар янги бозорлар орқали ўсишни давом эттиришга ҳаракат қилмоқда. Европа эса улар учун ҳозир энг муҳим йўналишлардан бирига айланмоқда.
“Zamin”ни Telegram'да ўқинг!
