Байден Путинни ядро қуролидан фойдаланмасликка чақирди

^{Фото: Reuters}
АҚШ президенти Жо Байден Россия раҳбари Владимир Путинни Украинада кимёвий ёки тактик ядро қуролидан фойдаланиш фикридан воз кечишга чақирди.

"Керак эмас. Керак эмас. Керак эмас. Сиз урушнинг қиёфасини ўзгартириб юборасиз", - деди Байден CBS телеканалига берган интервюсида “Путин ана шундай имконият ҳақида ўйлаганда унга нима деган бўлардингиз” деган саволга жавобан.

Шу билан бирга, Байден Россия шундай йўл тутган тақдирда АҚШнинг жавоби қандай бўлиши ҳақидаги саволга аниқ жавоб айтмади.

"Агар нима бўлишини билганимда сизга айтармидим?, – деди у журналист Скотт Пеллига. – Албатта айтмайман. Бунинг оқибатлари бор".

Унинг қўшимча қилишича, Россия Украинада кимёвий ёки тактик ядро қуролини қўллайдиган бўлса, "аввалгидан ҳам баттар қувғиндига айланади".

17 сентябр куни Владимир Путиннинг матбуот котиби Дмитрий Песков журналистларнинг Москва Украинада ядро қуролидан фойдаланиши мумкинлиги тўғрисидаги саволига "Доктринани ўқинг. Унда ҳаммаси ёзилган", деб жавоб қайтарди.

Доктринада Россия ядро қуролидан унга ёки иттифоқчиларига ядро қуроли билан ҳужум қилинган тақдирда фойдаланиши мумкинлиги айтилган. “Замин” янгиликларини “Telegram”да кузатиб боринг