Украинадаги урушда қатнашаётган Россия қўшинларига янги қўмондон тайинланди

^{Фото: РИА Новости}
Армия генерали Сергей Суровикин Украинадаги урушда қатнашаётган Россия қўшинига қўмондон қилиб тайинланди.

«Россия Федерацияси мудофаа вазирининг қарори билан армия генерали Сергей Суровикин махсус ҳарбий операция ўтказилаётган ҳудуддаги бирлашган кучлар гуруҳи қўмондони этиб тайинланди», — деди Россия Мудофаа вазирлиги матбуот котиби Игор Конашенков.

Июнь ойида Мудофаа вазирлиги Украина ҳудудидаги жанубий кучлар гуруҳига Сергей Суровикин раҳбарлик қилаётгани ҳақида хабар берган эди.

Сергей Суровикин 2017 йилдан бери аэро-космик кучлар бош қўмондони лавозимида ишлаб келаётган эди. У Тожикистондаги қуролли можароларда, Иккинчи Чечен урушида ва Суриядаги ҳарбий амалиётда қатнашган. 2017 йилда у Суриядаги ҳарбий ҳаракатларда қатнашгани учун Россия Қаҳрамони унвонини олган.

Шу пайтгача Украинадаги урушда Россия қўшинларига ким қўмондонлик қилгани ҳақида расмий хабарлар берилмаган эди. Матбуотда тарқалган маълумотларга кўра, бундан олдин қўшинларга генерал Александр Дворников раҳбарлик қилган бўлиши мумкин. “Замин” янгиликларини “Telegram”да кузатиб боринг