Перу президентига импичмент эълон қилингач, у полиция томонидан қўлга олинди

^{Педро Кастильо
Фото: Zuma}
Перуда президент Педро Кастильога нисбатан парламент томонидан импичмент эълон қилингач, у полиция томонидан қўлга олинди. Бу ҳақда La Vanguardia ва El Comercio нашрлари хабар бермоқда.

El Comercio маълумотларига кўра, конгресс Педро Кастильони лавозимидан озод этиш ҳақида қарор қабул қилгач, махсус йиғилишда Перу вице-президенти Дина Болуарте республиканинг янги президенти сифатида қасамёд қабул қилган.

Перу парламенти 7 декабрь куни президентга нисбатан импичмент масаласини учинчи марта кўриб чиқиши керак эди. Ундан аввалги уринишлар эса муваффақиятсизликка учраганди. Бироқ бундан бир неча соат аввал Кастильо мурожаат билан чиқди.

Конгресс Кастильони коррупциявий жиноятларни амалга оширганликда айблади. Президент ўз мурожаатида айбловларни инкор қилди ва уларни асоссиз деб атади. Парламентнинг бир қисми президентнинг ҳокимиятдан ағдарилишини у лавозимига киришганидан буён «кун тартибида мавжуд бўлган ягона банд» деб ҳисоблайди, деди у.

Кастильо республика конгрессини тарқатиб юбориб, мамлакатда комендантлик соатини жорий қилди. Шунга қарамай, конгресс мамлакат президентини четлатиш ҳақида қарор қабул қилди. Қарор 101 нафар конгрессмен томонидан қўллаб-қувватланди, у маъқулланиши учун эса 87 та овоз етарли бўлади.

RPP радиоси ўз манбаларига таяниб маълум қилишича, полиция ва ҳарбийлар конгресс томонига ўтган. Президент баёнотидан кейин полиция бош қароргоҳида фавқулодда йиғилиш бошланган.

Кастильонинг хатти-ҳаракатларини Болуарте қоралаб чиқди. Адлия вазири Феликс Шеро, иқтисодиёт вазири Курт Бурнео, ташқи ишлар вазири Цезарь Ланда ва меҳнат вазири Алехандро Салас ва бошқа сиёсатчилар истеъфо берди.

Перу бош прокуратураси давлат раҳбарини Конституцияни қўпол равишда бузишда айблади. Идора раҳбари Даниэль Сориа Кастильога қарши жиноий иш қўзғаш билан таҳдид қилди.

Конституциявий суд раиси Франциско Моралес воқеаларни тўнтариш деб атади ва конгрессни ваколатларни давлат раҳбари Болуартега топширишга чақирди.

Кастильо 2021 йил июлида Перу президенти сайловида ғолиб чиққан эди. Собиқ қишлоқ ўқитувчиси ижтимоий ислоҳотлар ўтказиш ва мамлакат бойликларини одилона тақсимлаш ҳақидаги популистик ваъдалари билан аҳолининг энг қашшоқ қатламларининг овозларини қўлга киритганди. “Замин” янгиликларини “Telegram”да кузатиб боринг