The First Group (БАА) қурилиш компанияси маълумотларига кўра, дунёдаги энг баланд меҳмонхона 2024 йилнинг биринчи чорагида Дубайда очилади.
82 қаватли, баландлиги 365 метр бўлган Ciel меҳмонхонаси келаси йилнинг бошида тайёр бўлади. NORR архитектура компанияси билан ҳамкорликда ишлаб чиқилган Ciel 1042 та хонага, шу жумладан 150 та люкс хонага эга бўлади.
Меҳмонхонанинг 81-қаватида Дубай горизонти, Palm Jumeira ва Арабистон кўрфазининг панорамик манзараларини томоша қилиш имконини берувчи кузатув майдончаси, 76-қаватда эса пейзаж ҳовузи ва бар жойлашади.
«Биз Ciel меҳмонхонасини Дубайда тақдим этганимиздан жуда хурсандмиз, бу юқори даражадаги меҳмондўстликни белгилаб берадиган ва шаҳар тақдим этаётган энг яхши нарсаларни ўз ичига олган лойиҳа», деди Роб Бёрнс, The First Group бош директори.
«Пандемия билан боғлиқ муаммоларга қарамай, биз катта ютуқларга эришмоқдамиз ва 2024 йилда меҳмонхонанинг расмий очилиши сари қатъий ҳаракат қиляпмиз. Ciel ўзининг ноёб дизайни, ҳашаматли қулайликлари ва ажойиб манзаралари билан меҳмонларга тенгсиз ҳиссиётларни тақдим этади. Ciel шунчаки бино эмас, балки Дубайнинг амбициялари, инновациялари, ижодкорлиги ва мукаммаллиги рамзидир», деб қўшимча қилди Бёрнс.
Ҳозирги вақтда Дубайнинг бошқа меҳмонхонаси Gevora Hotel 355 метр баландликка эга дунёдаги энг баланд меҳмонхона ҳисобланади.
Дунёдаги энг баланд бино ҳам Дубайда жойлашган - Бурж Халифа ердан деярли 830 метр баландликка кўтарилади.
“Замин” янгиликларини “Telegram”да кузатиб боринг
