Кечаги терактда террорчилардан бирининг автоматини олиб қўйган йигит воқеани сўзлаб берди (видео)

Москва вилоятида Crocus Cитй Ҳаллъдаги терактда террорчилардан бирининг автоматини олиб қўйган йигит воқеани сўзлаб берди.

У воқеа ҳақида “Россия 24” телеканалига берган интервьюсида айтиб берган. Хавфсизлик нуқтаи назаридан унинг шахси ошкор қилинмаган. Йигитнинг таъкидлашича, зинадан тушаётган вақтда одамларни отаётган террорчига дуч келишган. У автоматни қайта ўқлаётган пайтида йигит вазиятдан фойдаланиб қолган.

"Биз зинадан тушиб кетаётган пайтда одамларни совуққонларча отиб ташлаётган эркак билан юзма-юз келдик. У автоматини қайта ўқлаётганди. Мен турмуш ўртоғимнинг кўзига қараб, даҳшатни кўрдим ва нимадир қилиш кераклигини тушундим. Террорчини чап тарафдан айланиб ўтиб, автоматини ушлаб олдим ва қўлим билан юзига мушт туширдим. Яна бир эркак ёнимга югуриб келиб, менга ёрдам берди. Биз террорчини ерга қулатдик", — деди йигит.

Айни мазкур ҳодиса сабаб ўнлаб инсонларнинг ҳаёти сақлаб қолингани айтилган.

Терактда гумонланиб ушланган шахслардан бири бу ишни пул учун қилганини тан олганди.

Гумондор 4 март куни Туркиядан учиб келганини айтиб, теракт учун унга 500 минг рубль (67 млн сўмдан зиёд) таклиф қилинганини таъкидлаган. Ундан айнан кимнинг ўлими учун пул таклиф қилингани сўралганда, исталган фуқаро учун эканини билдирган.

Эълон қилинган кадрларда эркак ўзини Фариддун Шамсутдин дея таништирган, шунингдек, туғилган санаси 1998 йил 17 сентябрь эканини айтган. Унга залдаги барча одамларни ўлдириш топшириғи берилганини қайд этган. Қолаверса, жинояти учун унга тахминан 1 миллион рубль ваъда қилинганини ҳам тан олган.
“Замин” янгиликларини “Инстаграм”да кузатиб боринг