Блинкен Исроилдан учта муаммони ҳал этишни талаб қилди

^{Фото: AFP}
АҚШ давлат котиби Энтони Блинкен 13 ноябрь куни Исроилга Ғазодаги жангларда “реал ва доимий паузалар” ташкил этиш талаби билан мурожаат қилди. Бу ҳақда The Times of Israel хабар берди.

Блинкеннинг таъкидлашича, бу гуманитар ёрдам етказилишини таъминлаш учун зарур. Давлат котиби Исроил Байден маъмуриятининг белгиланган муддатидан олдин вазиятни яхшилаш учун бир қанча қадамлар қўйганини айтди. Лекин ҳали кўпроқ ҳаракат қилиш кераклигини таъкидлади.

"Биз Ғазонинг катта ҳудудларида узоқ муддатли паузалар, ҳар қандай жанговар ҳаракатларда танаффуслар бўлишига эришишимиз керак, токи инсонпарварлик ёрдами муҳтож одамларга тўсиқсиз етиб борсин", деди у.

Сиёсатчи Исроил АҚШ томонидан тавсия этилган 15 банддан 12 тасини бажарганини айтди. Давлат котиби яна учта муҳим масалани ҳал қилиш зарурлигини билдирди.

Уларнинг биринчиси — жанговар ҳаракатлардаги паузаларни узайтириш. Иккинчиси ва учинчиси тижорий юк машиналарининг Фаластин ҳудудига киришига рухсат бериш ва эвакуация буйруқларини бекор қилиш билан боғлиқ.

"Бундан ташқари, биз вақти келди деб ҳисоблаган жанговар ҳаракатларни тўхтатиш билан бир қаторда, таклиф қилинган гуманитар чоралар тўлиқ амалга оширилиши керак", деб тушунтирди у.

Блинкен ва Нетаньяху учрашуви

АҚШ давлат котиби Энтони Блинкен ва Исроил бош вазири Биньямин Нетаньяху сўнгги марта 22 октябрь куни Эроннинг Яқин Шарқдаги ҳаракатларига қарши туриш ҳақида музокара олиб борди. Ўшанда Блинкен Исроилни Ғазо секторига инсонпарварлик ёрдами етказиб бериш ҳажмини ошириш ва “ёрдам бутун Ғазодаги тинч аҳолига етиб боришини” таъминлаш учун қўшимча чоралар кўришга чақирди.

Ўз навбатида The Times of Israel газетаси эса Нетаньяху идорасига таяниб, бошқача маълумот берди. Жумладан, музокараларда Ғазо секторида жанговар ҳаракатлар тугагач, уни ким бошқариши ҳақида сўз борган. Бироқ баёнотда сектордаги янги ҳокимият органлари қандай бўлиши мумкинлиги тафсилотлари келтирилмаган. “Замин” янгиликларини “Twitter”да кузатиб боринг